Müasir dövrdə ən ciddi problemlərdən biri məhz tənhalıqdır. Tənhalıq insanın özünü digər insanlardan emosional və sosial baxımdan uzaq hiss etməsidir. Şəxs çoxlu insanların arasında olsa belə, özünü tənha hiss edə bilər. Buna görə də tənhalıq sadəcə tək qalmaq deyil, insanın anlayış və yaxınlıq ehtiyacının qarşılanmaması ilə bağlı psixoloji vəziyyətdir.
Texnologiyanın və sosial medianın inkişafına baxmayaraq, tənhalıq problemi daha çox diqqət çəkir. İnsanlar sosial şəbəkələr vasitəsilə bir-biri ilə əlaqə saxlasalar da, bu münasibətlər həmişə real emosional yaxınlığı əvəz etmir. Virtual ünsiyyətin çoxalması bəzən insanın real həyatda sosial əlaqələrinin azalmasına səbəb ola bilər.
Tənhalığın yaranmasına bir sıra müxtəlif amillər təsir edir. Ailə və dost münasibətlərində problemlər, başqa şəhərə və ya ölkəyə köçmək, sosial mühitə uyğunlaşa bilməmək, özünəinamın aşağı olması və uzun müddət davam edən stress bunlardan bəziləridir. Xüsusilə yeniyetmələr və gənclər sosial qəbul olunmaq ehtiyacına görə tənhalığı daha güclü yaşaya bilərlər.
Uzunmüddətli tənhalıq insanın psixoloji vəziyyətinə mənfi təsir göstərə bilər. Belə insanlarda kədər, motivasiya azalması, narahatlıq və özünəqapanma yarana bilər. Tənhalıq həmçinin insanın özünə və ətrafındakı insanlara münasibətini dəyişə bilər.
Bu problemin qarşısını almaq üçün insanlarla sağlam münasibətlər qurmaq, yaxınlarla açıq ünsiyyət saxlamaq, sosial fəaliyyətlərdə iştirak etmək və hobbilərə vaxt ayırmaq faydalıdır. İnsan özünü uzun müddət tənha və ümidsiz hiss edirsə, psixoloqla danışmaq da düzgün addım ola bilər.
Nəticə olaraq, tənhalıq müasir cəmiyyətin mühüm psixoloji problemlərindən biridir. İnsanların bir-biri ilə yalnız fiziki deyil, həm də emosional əlaqə qurması bu problemin azalmasında mühüm rol oynayır.
Modern.az-a açıqlamasında psixoloq Vüsalə Əmiraslanova bildirib ki, insanlar tənhalığı təkliklə səhv salırlar:
“Psixoloji baxımdan tənhalıq və təklik anlayışları bir-birindən fərqlənir. İnsan fiziki olaraq tək ola bilər, amma özünü tənha hiss etməyə bilər. Çox vaxt insanlar tənhalığı təkliklə səhv salırlar. Halbuki tənhalıq daha çox insanın ətrafındakı insanlar tərəfindən anlaşılmadığını, hiss edilmədiyini və emosional baxımdan onlardan təcrid olunduğunu düşünməsi ilə bağlıdır. Bəzən insan tək qala bilər, lakin özünü tənha hiss etməz. Əksinə, ətrafında çoxlu insanların olmasına baxmayaraq, özünü tənha hiss edən insanlar da var. Müasir dövrdə tənhalıq insanların həyatına ciddi təsir göstərə və onların psixoloji vəziyyətini əhəmiyyətli dərəcədə dəyişə bilər.
Bu baxımdan sosial medianın, müasir texnologiyaların və sosial şəbəkələrin də təsiri böyükdür. Bəzən insanlar düşünürlər ki, sosial şəbəkələrdən istifadə edirəmsə, deməli, tənha deyiləm. Lakin bu, reallıqdan uzaq bir düşüncədir. Virtual ünsiyyət hər zaman insanın emosional ehtiyaclarını qarşılamır. İnsanların bir-biri ilə emosional bağlarının zəifləməsi, bir-birindən uzaqlaşması və bir-birlərinə qarşı səbrlərinin azalması zamanla tənhalıq hissinin güclənməsinə səbəb ola bilər".
Psixoloq vurğulayıb ki, tənhalığın yaranmasında psixoloji faktorlar da mühüm rol oynayır:
"Bəzən insanın psixi vəziyyətində yaranan problemlər, narahatlıq və digər psixoloji çətinliklər tənhalıq hissinin meydana çıxmasına səbəb ola bilər. Məsələn, insan hər hansı psixoloji problemlə üzləşdikdə və ətrafındakı insanların ondan uzaqlaşdığını düşündükdə, öz qavrayışı və düşüncələri əsasında onların onu təcrid etdiyini və tək qoyduğunu hiss edə bilər. Buna görə də tənhalıq məsələsi psixologiya və psixiatriya sahəsində xüsusi əhəmiyyət daşıyır. Bu hissin səbəblərinin düzgün müəyyənləşdirilməsi və insanın psixoloji vəziyyətinin qiymətləndirilməsi üçün psixoloq və psixiatrların dəstəyi mühüm rol oynayır”.
Nicat Rüstəm
