Neftçala Rayon İcra Hakimiyyətinin başçısı Mirhəsən Seyidov növbəti səyyar qəbulunu Neftçala rayonunun Mürsəqulu kəndinin sakinləri ilə keçirib. Səyyar qəbulda Rayon İcra Hakimiyyətinin məsul əməkdaşları, hüquq-mühafizə orqanlarının, idarə, müəssisə və təşkilatların rəhbərləri, şəhid ailələrinin üzvləri, müharibə iştirakçıları və kənd ictimaiyyətinin nümayəndələri iştirak ediblər.
Modern.az xəbər verir ki, ilk olaraq Ulu Öndər Heydər Əliyevin və Azərbaycan Respublikasının ərazi bütövlüyünün, müstəqilliyinin, konstitusiya quruluşunun müdafiəsi zamanı şəhid olan hərbi qulluqçuların ruhu bir dəqiqəlik sükutla yad edilib.
Səyyar qəbul zamanı Xol Qaraqaşlı kənd inzibati ərazi dairəsi üzrə nümayəndə çıxış edərək, kəndin sosial-iqtisadi vəziyyəti, əhalinin məşğulluq durumu, infrastruktur təminatı və kənd ərazisində həyata keçirilən abadlıq-quruculuq işləri haqqında iştirakçılara ətraflı hesabat təqdim edib.
Çıxış edən natiqlər “Türk dünyasının birliyi və həmrəyliyi beynəlxalq sabitliyin və inkişafın dayağıdır” mövzusunda iştirakçılara ətraflı məlumat veriblər. Bildirilib ki, Türk dünyası xalqları arasında tarixi, mədəni və mənəvi bağların daha da möhkəmləndirilməsi müasir dövrdə regional əməkdaşlığın və beynəlxalq sabitliyin mühüm amillərindən birinə çevrilir. Qarşılıqlı etimad, həmrəylik və strateji tərəfdaşlıq əsasında formalaşan birlik Türk Dövlətləri Təşkilatına üzv və müşahidəçi dövlətlər arasında əməkdaşlığın genişləndirilməsi üçün yeni imkanlar yaradır. Türk dövlətləri arasında siyasi dialoqun, iqtisadi tərəfdaşlığın, nəqliyyat və enerji əlaqələrinin, eləcə də elm, təhsil, mədəniyyət və humanitar sahələrdə əməkdaşlığın inkişaf etdirilməsi ortaq maraqların daha səmərəli şəkildə həyata keçirilməsinə xidmət edir. Türk dünyasının həmrəyliyi yalnız üzv və qardaş ölkələrin rifahına deyil, bütövlükdə Avrasiya məkanında sülhün, təhlükəsizliyin və davamlı inkişafın təmin olunmasına mühüm töhfə verir.
Neftçala Rayon İcra Hakimiyyətinin başçısı Mirhəsən Seyidov çıxışında qeyd edib ki, Azərbaycanın dövlətçilik tarixində Türk dünyası ilə münasibətlərin möhkəmləndirilməsi, qardaş xalqlar arasında birlik və həmrəyliyin gücləndirilməsi hər zaman mühüm prioritetlərdən biri olub. Bu siyasətin təməlində Ümummilli Lider Heydər Əliyevin müəyyən etdiyi uzaqgörən dövlətçilik xətti dayanır. Ulu Öndər Heydər Əliyevin Azərbaycan-Türkiyə münasibətlərinin mahiyyətini ifadə edən “Bir millət, iki dövlət” kəlamı bu gün də iki qardaş ölkə arasındakı münasibətlərin əsas ideoloji və mənəvi dayaqlarından biridir. Ulu Öndər Heydər Əliyev türk dövlətləri arasında siyasi, iqtisadi, mədəni və humanitar əlaqələrin genişləndirilməsini Türk dünyasının gələcəyi baxımından mühüm amil hesab edirdi. Onun siyasi irsində Türk xalqlarının ortaq tarix, dil, mədəniyyət və mənəvi dəyərlər ətrafında daha sıx birləşməsi xüsusi yer tuturdu.
RİH-nin başçısı bildirib ki, bu siyasi kurs bu gün Azərbaycan Respublikasının Prezidenti cənab İlham Əliyev tərəfindən ardıcıl və məqsədyönlü şəkildə davam etdirilir. Prezident cənab İlham Əliyev dəfələrlə Türk dünyasının Azərbaycanın xarici siyasətində prioritet istiqamətlərdən biri olduğunu bəyan edib. Dövlətimizin başçısının ifadə etdiyi kimi, “Türk dünyası bizim ailəmizdir, bizim başqa ailəmiz yoxdur.” Bu yanaşma Azərbaycanın Türk Dövlətləri Təşkilatının gücləndirilməsi istiqamətində həyata keçirdiyi siyasətin mahiyyətini aydın şəkildə əks etdirir.
Azərbaycanın Türk dünyasının birliyinə verdiyi töhfələr Şuşada keçirilən beynəlxalq tədbirlərdə də öz aydın ifadəsini tapıb. 2024-cü il iyunun 15-də Şuşada keçirilən “Türk Dövlətləri Təşkilatı: geosiyasi reallıqlar və qlobal kataklizmlər fonunda yeni strateji hədəflərə doğru” mövzusunda beynəlxalq konfrans Türk dünyasının qarşısında dayanan strateji məsələlərin müzakirəsi baxımından mühüm əhəmiyyət daşıyıb. Prezident cənab İlham Əliyev konfrans iştirakçılarına müraciətində Türk Dövlətləri Təşkilatının yeni strateji hədəflərə doğru inamla irəlilədiyini, təşkilatda təmsil olunan dövlətlər arasında dostluq, qardaşlıq, qarşılıqlı anlaşma, bərabərhüquqlu tərəfdaşlıq və çoxşaxəli əməkdaşlığın həm milli və regional, həm də qlobal miqyasda sabitliyə, təhlükəsizliyə və inkişafa xidmət etdiyini bildirib.
RİH-in başçısı, Zəfərlə yekunlaşan 44 günlük Vətən müharibəsindən sonra bölgədə yaranan yeni geosiyasi reallıqlar fonunda Müzəffər Ali Baş Komandan İlham Əliyevin tarixi ədalətin bərpa edilməsi konsepsiyasının davamının məcburi köçkünlərin və qaçqınların Böyük Qayıdışını təmin etmək olduğunu bildirib. O, həmçinin Azərbaycan xalqının milli-mənəvi dəyərlərini və haqqını bərpa etmək missiyasının önəmindən danışıb.
Neftçala RİH-in başçısı, Prezident cənab İlham Əliyevin müvafiq Sərəncamı ilə 2026-cı ilin “Şəhərsalma və Memarlıq ili” çərçivəsində Neftçala rayonunda həyata keçirilən yenidənqurma işləri, 2026–2030-cu illər üçün kənd təsərrüfatının inkişafına dair Dövlət Proqramından irəli gələn vəzifələrin Neftçala rayonunda icrası, kənd təsərrüfatının inkişafı və bu sahədə mövcud potensialdan səmərəli istifadə istiqamətində həyata keçirilən tədbirlər haqqında görüş iştirakçılarını məlumatlandırıb.
Səyyar qəbul zamanı vətəndaşlar tərəfindən suvarma suyunun verilməsi, suburaxıcı qapının yerinin dəyişdirilməsi, suvarma suyuna nəzarət, Xol Qaraqaşlı ASM-də doğum şöbəsinin fəaliyyətinin bərpası və dövlət tərəfindən vətəndaşlara verilən dərmanların kənddə verilməsi, kənddaxili yolların təmiri, Xanməmmədli–Qaçaqkənd–Qırmızıkənd–Xolqarabucaq–Xəzərkənd avtomobil yolunun hərəkət istiqamətini göstərən yol nişanlanma xətləri ilə rənglənməsi və digər sosial məsələlərlə bağlı müraciətlər səsləndirilib. Qaldırılan məsələlər hər bir müraciət üzrə ayrı-ayrılıqda dinlənilib, ətraflı şəkildə müzakirə olunub və onların həlli istiqamətində aidiyyəti qurumlara müvafiq tapşırıqlar verilib.
Səyyar qəbul zamanı vətəndaşlar göstərilən yüksək diqqət və qayğıya, həmçinin rayon ərazisində aparılan abadlıq-quruculuq işlərinə görə Azərbaycan Respublikasının Prezidenti cənab İlham Əliyev və Birinci vitse-prezident Mehriban xanım Əliyevaya minnətdarlıqlarını ifadə ediblər.
Məlumat üçün bildiririk ki, vətəndaş məmnunluğunu artırmaq və xidmət keyfiyyətinin yaxşılaşdırılmasını təmin etmək məqsədilə vətəndaşlar Neftçala Rayon İcra Hakimiyyəti ilə həm onlayn, həm də yerində görüşlər üçün yaradılan "Rəqəmsal İcra Hakimiyyəti" //rih.gov.az portalına daxil olaraq müraciət edə bilərlər.
