Bütün dünyada bankların müxtəlif istiqamətlər üzrə nailiyyətlərini qiymətləndirən “Global Finance” jurnalı “Dünyanın ən yaxşı rəqəmsal bankları 2026” mükafatlarının qaliblərini elan edib. ABB Azərbaycan üzrə “Ən yaxşı fərdi rəqəmsal bank” və “Ən innovativ fərdi rəqəmsal bank” mükafatlarına layiq görülüb. Xatırladaq ki, “Global Finance” jurnalı “Ölkə üzrə ilin ən yaxşı bankı” mükafatını da bu ilin mayında ABB-yə təqdim edib.
Bank bu yüksək mükafatları müştərilərin fərdi ehtiyaclarına uyğun hazırlanaraq mütəmadi inkişaf etdirdiyi rahat, əlçatan, təhlükəsiz rəqəmsal bankçılıq alətlərinə, həmçinin süni intellekt həllərinə görə layiq görüb.
“Banklar süni intellektdən, avtomatlaşdırmadan və data analitikasından istifadə imkanlarını genişləndirdikcə, rəqəmsal bankçılıq maliyyə sektorunun ən mühüm prioritet istiqamətlərindən birinə çevrilir. Sürətə, fərdiləşdirilmiş xidmətlərə və qüsursuz rəqəmsal təcrübəyə artan tələblər bankları innovasiyalara sövq edir. Bununla yanaşı, təhlükəsizliyin, dayanıqlılığın və tənzimləyici tələblərə uyğunluğun gücləndirilməsi də əsas diqqət mərkəzində qalır” - “Global Finance” jurnalının şərhində bildirilir.
Qeyd edilir ki, “Global Finance”ın “Dünyanın ən yaxşı rəqəmsal bankları 2026” siyahısında yer alan maliyyə institutları bütün dünyada rəqəmsal bankçılıq üçün yeni standartlar müəyyənləşdirən banklardır. Qaliblərin tam siyahısı ilə buradan tanış olmaq mümkündür.
“Global Finance” jurnalı 1987-ci ildən fəaliyyətdədir. Baş ofisi Nyu-Yorkda yerləşir. Jurnal 195-ə yaxın ölkədə 50 mindən çox oxucuya malikdir. Bu auditoriya, əsasən, iri şirkətlərin, o cümlədən beynəlxalq miqyaslı maliyyə qurumlarının qərarverici menecerlərini əhatə edir. Nəşrin hər il ayrı-ayrı banklara təqdim etdiyi mükafatlar maliyyə dünyasında etibarlılıq və üstünlük standartı kimi qəbul olunur. Bankların seçimi korporativ maliyyə qurumlarının rəhbərləri, bankirlər, texnologiyalar üzrə məsləhətçilər, dünyanın müxtəlif ölkələrindən olan maliyyə analitiklərinin rəyləri nəzərə alınmaqla aparılır.
ABB-nin müasir, faydalı, universal məhsul və xidmətləri barədə ətraflı məlumatı Bankın filial və şöbələrindən, rəsmi internet səhifəsi //abb-bank.az/, 937 nömrəli Məlumat Mərkəzi və rəsmi sosial şəbəkə səhifələrindən əldə etmək mümkündür.
