Modern.az

Çexiyalı qonaqlar Ədəbiyyat muzeyində olublar

Çexiyalı qonaqlar Ədəbiyyat muzeyində olublar

24 Sentyabr 2009, 19:25

Çexiya Parlamenti Senatı sədrinin xanımı Radmila Sobotka sentyabrın 24-də Azərbaycan Milli Elmlər Akademiyasının (AMEA) Nizami Gəncəvi adına Azərbaycan Ədəbiyyatı Muzeyində olub.
Muzeylə yaxından tanışlıq zamanı qonaqlara bildirilib ki, 1850-ci ildə birmərtəbəli karvansara kimi tikilmiş bina 1915-ci ildə ikinci mərtəbə artırılaraq mehmanxana kimi fəaliyyət göstərib. 1918-1920-ci illərdə burada Azərbaycan Xalq Cümhuriyyətinin Nazirlər Kabineti, 1920-1930-cu illərdə Azərbaycan Həmkarlar İttifaqı yerləşib. 1939-cu ilin noyabrında Azərbaycanın dahi şairi Nizami Gəncəvinin 800 illik yubileyi münasibətilə respublika Nazirlər Kabinetinin qərarı ilə Nizami Muzeyi yaradılıb. Muzeyin həmin binada yerləşdirilməsi məqsədi ilə memarlar Sadıq Dadaşov və Mikayıl Hüseynovun layihəsinə əsasən burada yenidənqurma işləri aparılmış, fasadda heykəllər qoyulmuş, daha iki mərtəbə əlavə edilib.
Muzeyin ekspozisiyasında 25 mindən çox eksponat var. Bütün ekspozisiya salonları kompyuterləşdirilib, tamaşaçıların müstəqil işləmələri üçün monitorlar quraşdırılıb, Azərbaycan, ingilis və rus dillərində informasiya bazası yaradılıb, audio-video materialları seyr etmək üçün 14 monitor və dinləmə qurğuları olan xüsusi böyük salon təşkil edilib.
Radmila Sobotka Yaxın və Orta Şərqdə, eləcə də Avropada yeganə ədəbiyyat muzeyi olan bu mədəniyyət ocağının böyük konfrans salonunu, “Qədim dövr”, “Dədə Qorqud”, “Nizami Gəncəvi”, “Məhsəti Gəncəvi”, “Xaqani Şirvani”, “İmadəddin Nəsimi”, “Məhəmməd Füzuli”, “Şah İsmayıl Xətai” salonlarını gəzib.
Qonaq üçüncü mərtəbədə nümayiş olunan maraqlı eksponatlar arasında Pənah xana məxsus, üzərində “Qurani-Kərim” ayələri yazılmış “gülləbatmaz” köynək, Mirzə Fətəli Axundovun, Həsən bəy Zərdabinin, Cəfər Cabbarlının, Məmməd Səid Ordubadinin, Abdulla Şaiqin, Mir Cəlal Paşayevin, Nigar Rəfibəylinin və başqalarının şəxsi əşyaları, şəkilləri, habelə ötən əsrin 30-cu illərində repressiya qurbanı olmuş şair və yazıçıların sənədlərinin surətləri ilə tanış olub.
Sonda Muzeyin direktoru Rafael Hüseynov Çexiya Parlamenti Senatı sədrinin xanımı Radmila Sobotkaya muzeyin təşəbbüsü ilə çap olunmuş kitablar və bukletlər təqdim edib.
 

Instagram
Gündəmdən xəbəriniz olsun!
Keçid et
Rusiyada ağır döyüşlər: Ukrayna partizanları əraziləri bombalayır