İyunun 6-dan İsveçdə vətəndaşlıq almaq üçün daha sərt qaydalar qüvvəyə minəcək. Bu qaydalar bütün müraciət edənlərə, hətta bir neçə il əvvəl müraciət edənlərə də şamil ediləcək.
Müxalifətin keçid qaydalarını tətbiq etmək cəhdi parlament tərəfindən 146-ya qarşı 147 minimal üstünlüklə rədd edildi.
Modern.az xəbər verir ki, yeni qaydalara görə, vətəndaşlıq almağa görə müraciət üçün minimum yaşayış müddəti beş ildən səkkiz ilə qədər artırılır. Həmçinin 16 yaşdan yuxarı şəxslər üçün İsveç dili və sosial elmlərdən məcburi imtahanlar da tətbiq olunur. Onların tətbiqi oktyabrın 1-nə qədər təxirə salına bilər. Əlavə olaraq, gəlirlə bağlı tələb müəyyən edilir - ildə ən azı 241 800 kron (təxminən 22 min dollar), eləcə də ədəbli həyat tərzi meyarları sərtləşdirilir.
Sol Partiyasının nümayəndəsi Toni Haddu hesab edir ki, insanlar müraciət zamanı qüvvədə olan qaydalara güvənmək imkanına malik olmalıdırlar. Yaşıllar Partiyası xəbərdarlıq edib ki, dəyişikliklər uzunmüddətli işləmə səbəbindən qərar gözləyən on minlərlə ərizəçiyə təsir edəcək.
Eyni zamanda, hakim partiyaların nümayəndələri vurğulayıblar ki, qaydaların sərtləşdirilməsi təhlükəsizliyin artırılması və cinayətkarlıqla əlaqələri olan şəxslərin vətəndaşlıq almasının qarşısının alınması məqsədi daşıyır və yeni qaydalar mümkün qədər tez tətbiq edilməlidir. Nəticədə qanun 258 səs çoxluğu ilə, 33 səs əleyhinə olmaqla qəbul edilib, 58 üzv isə iştirak etməyib.
