Deputatların əməkhaqqı və pensiya təminatı hər zaman cəmiyyətin diqqətini çəkən məsələlərdən biridir. Xüsusilə parlament üzvlərinin adi vətəndaşlardan fərqli olaraq hansı maliyyə imkanlarına sahib olması maraq doğurur.
Modern.az xəbər verir ki, Rusiyan nəşri Dövlət Dumasının deputatlarının və Federasiya Şurasının üzvlərinin 2026-cı ildə aldıqları əməkhaqqı, pensiya təminatı və parlament fəaliyyətindən sonra əldə edə biləcəkləri əlavə ödənişlər barədə məlumat yayıb.
Məlumata görə, Rusiya parlamentinin hər iki palatasının üzvləri həm əməkhaqqı, həm də parlamentdəki fəaliyyət müddətinə görə xüsusi pensiya əlavəsi almaq hüququna malikdirlər.
Deputatların aylıq maaşı nə qədərdir?
Rusiya qanunvericiliyinə əsasən, Dövlət Dumasının deputatları və Federasiya Şurasının üzvləri eyni maliyyə təminatı və həvəsləndirici ödənişlər sistemi ilə əhatə olunurlar.
Bu ödənişlər federal nazirin əməkhaqqına uyğunlaşdırılıb. Parlament palatalarının sədrləri isə bu qaydadan istisna təşkil edir.
2026-cı ilin iyulunda mediada deputatların maaşları ilə bağlı təxminən 650 min rubl məbləğində rəqəm səsləndirilib. Bildirilib ki, əvvəlki dövrlərdə büdcədə bir deputatın aylıq təminatı üçün bu məbləğə yaxın vəsait nəzərdə tutulub.
Lakin bu rəqəm 2026-cı ildə hər bir deputatın aldığı təsdiqlənmiş aylıq əməkhaqqı hesab edilə bilməz.
Faktiki ödənişlər həvəsləndirici əlavələrdən asılı olaraq dəyişə bilər. Buna görə də deputatların hamısının eyni məbləğdə maaş aldığını söyləmək olmaz.
Deputatlar nə qədər pensiya alırlar?
Parlament üzvlərinin pensiya təminatı adi pensiya sistemindən fərqlənir. Onların pensiyası sığorta pensiyası ilə yanaşı, parlamentdəki fəaliyyət müddətinə görə verilən xüsusi əlavə ödənişdən formalaşır.
Rusiyanın Maliyyə Universitetinin professoru Aleksandr Safonovun TASS-a açıqlamasına görə, 2026-cı ildə Dövlət Dumasında 5 ildən 10 ilədək çalışan deputatın pensiyası təxminən 52 min rubl təşkil edə bilər.
Parlamentdə 10 ildən artıq fəaliyyət göstərən deputatların pensiyası isə təxminən 72 min rubla çata bilər.
Ekspertin hesablamalarında sığorta pensiyasının məbləği təxminən 27 min 224 rubl götürülüb.
Deputatların pensiyasının məbləği onların parlamentdə neçə il işləməsindən birbaşa asılıdır.
