“Düşünürəm ki, 2020-ci il hadisələri təbii olaraq emosiyalarla müşayiət olunurdu və bu tamamilə başadüşüləndir”.
Modern.az xəbər verir ki, bunu jurnalistlərlə söhbətində Ermənistanın baş naziri Nikol Paşinyan bildirib.
44 günlük müharibə zamanı şəxsi hissləri ilə bağlı suala cavab verən Paşinyan deyib:
“Yəqin ki, 2020-ci il noyabrın 8-dən sonra şüurlu həyatımda ilk dəfə gündəlik dua etməyi dayandırdım. Bundan sonra uzun müddət oruc tutdum. Bir həftə ərzində nə çörək yedim, nə də su içdim. Əgər mənim emosiyalarımı soruşursunuzsa - onlar məhz belə idi. Amma sonra baş verənlər və bunun səbəbləri haqqında düşünməyə başladım. Və əlbəttə, dərhal yox, sonradan anladım ki, Ermənistan Qarabağ hərəkatına görə tələyə düşüb və bu tələdən çıxmaq lazım idi”.
Paşinyan vurğulayıb ki, Ermənistanı bu tələdən çıxara bildiyi üçün sevinir və bununla fəxr edir.
“Emosiyalar artıq başqa məsələ ilə bağlıdır - görürəm ki, bu gün bəzi konkret şəxslər casusluq məntiqi ilə Ermənistanı yenidən münaqişə tələsinə qaytarmaq istəyirlər. Hekayə bundan ibarətdir. Təəccüblənirəm - doğrudanmı elə bir insan var ki, bu mövzular onun üçün emosional deyil? Əgər belə biri varsa... təəccüblənmərəm ki, bu, emosiyası olmayan Robert Köçəryan kimi biridir. Düşünürəm ki, həbsxanada emosiyalar tədricən bərpa olunacaq.
Bəli, mən emosional insanam - bu sizin üçün yenilikdir? Mən müxalifət deputatı və jurnalist olanda emosional deyildimmi? Emosiyasız insan ya taxtadır, ya da kərpic. Təəssüf ki, siyasi meydanda müxtəlif qüvvələrin istifadə etdiyi belə küt alətləri görürük,” - deyə baş nazir bildirib.
