Türkiyə əsilli siyasətçi Elif Eralp Almaniyanın paytaxtı Berlinin rəhbəri ola bilər.
Modern.az xəbər verir ki, bu barədə “Financial Times” yazıb.
Solçu “Die Linke” (“Sol Partiya”) partiyasının Berlin seçkilərində əsas namizədi olan Elif Eralp şəhərin Türkiyə əsilli ilk rəhbəri olmaq imkanına malikdir. Bununla belə, Berlinin idarəedici meri birbaşa seçicilər tərəfindən deyil, şəhər parlamenti tərəfindən seçildiyindən nəticə partiyalar arasında mümkün koalisiya danışıqlarından da asılı olacaq.
Eralp 2017-ci ildə “Die Linke”yə üzv olub. Son illərdə partiyanın üzvlərinin sayı əhəmiyyətli dərəcədə artıb. Partiyanın rəsmi məlumatına əsasən, 2025-ci ilin sonuna üzvlərin sayı 123 min 500-ü keçib. Berlində isə partiyanın 17 mindən çox üzvü olub.
Eralpın seçki kampaniyasının əsas mövzularından biri mənzil problemidir. “Die Linke” iri daşınmaz əmlak şirkətlərinə məxsus təxminən 220 min mənzilin ictimai mülkiyyətə keçirilməsini müdafiə edir.
2021-ci ildə Berlində bu məsələ ilə bağlı keçirilən referendumda iştirakçıların 57,6 faizi böyük mənzil şirkətlərinin əmlakının ictimailəşdirilməsi ilə bağlı təşəbbüsə səs verib.
“Financial Times” qeyd edir ki, planın həyata keçirilməsinin maliyyə yükü ilə bağlı ciddi fikir ayrılıqları mövcuddur. Müxtəlif hesablamalarda kompensasiya və digər xərclərin 7 milyard avrodan 36 milyard avroyadək ola biləcəyi göstərilir.
Berlin seçkilərinin əsas mövzularından biri də mənzil çatışmazlığı və kirayə qiymətlərinin artmasıdır. “Reuters”in məlumatına görə, Berlin ev təsərrüfatlarının təxminən 85 faizi kirayə mənzillərdə yaşayır və şəhərdə 2040-cı ilədək əlavə 211 min mənzilə ehtiyac yarana bilər.
