ABŞ Prezidenti Donald Tramp İranın 7 günlük atəşkəs təklifini rədd edib və köməkçilərinə bildirib ki, Vaşinqton noyabr ayında keçiriləcək aralıq seçkilərindən sonra İrana zərbələri yenidən başlada bilər.
Modern.az xəbər verir ki, bu barədə “The Wall Street Journal” (WSJ) ABŞ rəsmilərinə istinadən məlumat yayıb.
Tehranın təklif etdiyi plan döyüşlərin mərhələli şəkildə dayandırılmasını, Hörmüz boğazının açılmasını və İranın nüvə proqramı ilə bağlı danışıqların bərpa edilməsini nəzərdə tutur.
Bunun müqabilində İran ABŞ-dən ölkənin limanlarına tətbiq olunan dəniz blokadasını aradan qaldırmağı, neft ixracına qoyulan məhdudiyyətləri yumşaltmağı və dondurulmuş aktivlərin bir hissəsini azad etməyi istəyir.
İranın xarici işlər naziri Abbas Araqçı bildirib ki, razılaşma çərçivəsində ilk tədbirlər 4-5 gün ərzində həyata keçirilməlidir. Altıncı gün İran Hörmüz boğazını normal gəmiçilik üçün açmağa hazırdır. Yeddinci gün isə tərəflər nüvə proqramı ilə bağlı yekun razılaşmanın müzakirəsinə başlamalıdır.
Araqçının sözlərinə görə, Tehranın təklifləri ABŞ-yə vasitəçilər, o cümlədən Qətər vasitəsilə çatdırılıb.
Lakin mənbələrin məlumatına görə, Tramp administrasiyası dəniz blokadasını aradan qaldırmaq niyyətində deyil. Vaşinqton hesab edir ki, davam edən iqtisadi təzyiq Tehranı ABŞ və Fars körfəzindəki müttəfiqlərinin məqbul hesab etdiyi şərtlərlə razılaşma imzalamağa məcbur edə bilər.
Bununla yanaşı, ABŞ və İran nümayəndələri vasitəçilər üzərindən təklif mübadiləsini davam etdirirlər.
Tramp açıq şəkildə bildirir ki, İran aralıq seçkilərdən sonra razılaşma əldə etməyə və nüvə proqramını tamamilə sökməyə razılaşmağa çalışır. Eyni zamanda ABŞ rəsmiləri prezidentin Tehranın onun tələblərini yerinə yetirməyə hazır olduğuna şübhə ilə yanaşdığını və köməkçilərinə seçkilərdən sonra bombardmanların yenidən başlaması ehtimalından danışdığını bildirirlər.
Bununla belə, mümkün yeni hərbi əməliyyatın miqyası hələlik məlum deyil.
WSJ-nin mənbələrinin sözlərinə görə, Tramp genişmiqyaslı hərbi əməliyyatları yenidən başlatmaq istəmir. Buna səbəblərdən biri digər mümkün münaqişələr üçün getdikcə azalan sursat ehtiyatlarının qorunmasıdır.
Nəşrin həmsöhbətləri həmçinin bildiriblər ki, ABŞ prezidentinin mövqeyi qarşıdakı həftələrdə dəyişə bilər.
