Ermənistan yeni Konstitusiyanın qəbul edilməsinin Azərbaycanla sülhün bərqərar olması üçün kifayət edib-etməyəcəyini və sülh sazişinin imzalanmasının bütün mübahisəli məsələlərin birdəfəlik həlli demək olub-olmayacağını aydınlaşdırmaq niyyətindədir.
Modern.az xəbər verir ki, bu barədə Ermənistanın Baş naziri Nikol Paşinyan parlamentdə 2027-ci ilin dövlət büdcəsi layihəsinin müzakirəsi zamanı danışıb.
“Ermənistan yeni Konstitusiyanı qəbul etdikdən sonra Azərbaycanla sülh sazişi imzalanacaqmı? Sazişin imzalanmasının özü Ermənistanla Azərbaycan arasında münasibətlərdə heç bir münaqişəli gündəmin qalmayacağı hərtərəfli sülhün qurulması demək olacaqmı?” - deyə Paşinyan suallar səsləndirib.
Onun sözlərinə görə, yaxın vaxtlarda İrəvanın səyləri məhz bu suallara cavab almağa yönələcək.
Xatırladaq ki, bir müddət əvvəl Ermənistanın Baş naziri Nikol Paşinyan yeni Konstitusiyanın qəbulu məsələsində müxalifətin dəstəyini ictimai təzyiq formalaşdırmaq yolu ilə əldə edəcəyini bildirmişdi.
Buna cavab olaraq “Ermənistan” fraksiyasının rəhbəri Anna Qriqoryan hakimiyyətin təklif etdiyi konstitusiya dəyişikliklərinin əleyhinə səs verəcəklərini açıqlamışdı.
Qeyd edək ki, Azərbaycan Ermənistanla sülh müqaviləsinin imzalanması üçün bu ölkənin Konstitusiyasının dəyişdirilməsini şərt kimi irəli sürür.
Konstitusiya dəyişikliklərinin və ya referendumun təşəbbüs edilməsi üçün hakim siyasi qüvvənin parlamentdə deputatların üçdə iki səs çoxluğunu əldə etməsi lazımdır.
2026-cı il iyunun 7-də keçirilən seçkilərin nəticələrinə əsasən, 49,81 faiz səs toplayan hakim “Mülki müqavilə” partiyası konstitusiya çoxluğunu qazana bilməyib.
