Bu gün Prezident İlham Əliyevin sədrliyi ilə “Azərbaycan Respublikasında 2027-2030-cu illərdə dağ-mədən (metal filizləri) və metallurgiya sənayesinin inkişafına dair Dövlət Proqramı”na həsr olunmuş müşavirə keçirilib.
Dağ-mədən və metallurgiya sənayesinin inkişafına dair Dövlət Proqramına həsr olunmuş müşavirənin yekunları, həmçinin bu çərçivədə Daşkəsən rayonunun yeni iqtisadi mərhələdəki rolu geniş müzakirə olunub.
“Qərb Sənaye Parkının yaradılmasının əsas məqsədi məhz dağ-mədən sənayesinin inkişafıdır. Çünki “Daşkəsən” filiz yatağının istismarı və ona yaxın olan bölgələrdə digər layihələrin icra edilməsi, əlbəttə ki, məhz Qərb Sənaye Parkının yaradılmasını şərtləndirdi. Burada, ilk növbədə, tezliklə infrastruktur yaradılmalıdır və bu məqsədlə büdcədə lazımi vəsait nəzərdə tutulmalıdır. Dağ-mədən sənayesinin son məhsula qədər tam zənciri yaradılmalıdır. Burada təbii ki, filiz hasilatı və bir neçə zavodun yaradılması nəzərdə tutulur”,-deyə Prezident vurğulayıb.
Modern.az-a açıqlamasında Daşkəsənin deputatı Kamran Bayramov bildirib ki, Prezident İlham Əliyevin sədrliyi ilə keçirilən müşavirə ölkəmizin milli iqtisadi strategiyasında keyfiyyətcə yeni və strateji bir mərhələnin təməlini qoyub:
"Dövlət başçısının tədbirdəki çıxışı Azərbaycanın neft-qaz amilindən asılılığını minimuma endirmək, qeyri-neft sənayesinin payını sıçrayışla artırmaq və ağır sənayenin tam inteqrasiya olunmuş dəyər zəncirini formalaşdırmaq xəttinin qətiyyətlə davam etdirildiyini nümayiş etdirir. Bu baxımdan, təqdim olunan 2027–2030-cu illəri əhatə edən yeni Dövlət Proqramı yalnız lokal xarakterli iqtisadi tədbirlər planı deyil, ölkənin uzunmüddətli sənayeləşmə modelinin, xammal ehtiyatlarının yüksək texnoloji emalının və regional inkişaf drayverlərinin vahid platformada birləşdirilməsidir".
Deputat vurğulayıb ki, son iyirmi ildə ardıcıl şəkildə həyata keçirilən iri miqyaslı infrastruktur layihələri bu gün sənaye sıçrayışı üçün möhkəm baza yaradır:
"Ölkədə qazlaşdırmanın yüksək səviyyəyə çatdırılması, elektrik enerjisi istehsalında böyük ehtiyat güclərinin formalaşdırılması, müasir nəqliyyat-logistika dəhlizlərinin qurulması dağ-mədən və metallurgiya kimi maliyyə və resurs tutumlu sahələrin sürətli inkişafına tam zəmin yaradır. Neft hasilatının obyektiv səbəblərdən sabitləşməsi fonunda qeyri-neft sənayesində əldə olunan yüksək artım dinamikası göstərir ki, dövlətimiz vaxtında sığortalayıcı və diversifikasiya yönümlü addımlar atmışdır. Bu yeni mərhələdə dağ-mədən və metallurgiya sənayesinin inkişafı qeyri-neft ÜDM-nin artımına güclü təkan verməklə yanaşı, ölkənin xarici ticarət balansında ağır sənaye məhsullarının xüsusi çəkisini əhəmiyyətli dərəcədə yüksəldəcəkdir".
K.Bayramovun sözlərinə görə, bu strateji planlaşdırmanın mərkəzində dayanan ən mühüm coğrafiyalardan biri şübhəsiz ki, Daşkəsən rayonudur:
"Zəngin dəmir filizi ehtiyatlarına və dərin tarixi dağ-mədən ənənələrinə malik olan Daşkəsən ölkənin yeni metallurgiya klasterinin ana mərkəzinə çevrilir. Prezident İlham Əliyevin qeyd etdiyi kimi, təbii resurslardan səmərəli istifadə olunması və xammaldan son hazır məhsuladək tam istehsal zəncirinin qurulması Daşkəsən dəmir filizi yataqlarının yenidən və ən müasir texnologiyalarla istismarını zəruri edir. Yataqların müasir geoloji-kəşfiyyat üsulları ilə dəqiqləşdirilməsi, filizsaflaşdırma komplekslərinin yenidən qurulması və emal müəssisələrinin yaradılması Daşkəsəni sadəcə xammal çıxaran rayon statusundan çıxararaq yüksək əlavə dəyər yaradan sənaye nəhənginə çevirəcəkdir".
O qeyd edib ki, Daşkəsən rayonunda sənaye obyektlərinin sürətli inkişafı və metallurgiya zəncirinin bərpası yerli əhalinin sosial-iqtisadi həyatında köklü dönüş yaratmaq potensialına malikdir:
"Müşavirədə bütövlükdə proqram çərçivəsində beş mindən çox yeni daimi iş yerinin açılmasının nəzərdə tutulduğu bildirilmişdir ki, bu da məşğulluq imkanlarının böyük bir hissəsinin birbaşa Daşkəsən rayonunun və ətraf bölgələrin payına düşəcəyindən xəbər verir. Yeni istehsalat sahələrinin, saflaşdırma fabrik və kombinatlarının fəaliyyətə başlaması yüksək ixtisaslı mühəndis, texnik və fəhlə kadrlarına tələbatı artıracaq, gənclər üçün müasir əmək bazarında layiqli yer tutmaq imkanları açacaqdır. Bununla yanaşı, sənayenin inkişafı multiplikativ effekt verərək rayonda tikinti, nəqliyyat, xidmət, iaşə və kiçik sahibkarlıq sektorlarının da sürətlə canlanmasına gətirib çıxaracaqdır".
"Yerli əhali üçün bu perspektivlər həm də infrastrukturun və sosial rifahın keyfiyyətcə yeni səviyyəyə qaldırılması deməkdir. Mütərəqqi sənayeləşmə prosesi Daşkəsəndə yeni yaşayış massivlərinin, təhsil və səhiyyə müəssisələrinin, peşə təhsili mərkəzlərinin qurulmasını, yolların və mühəndis-kommunikasiya xətlərinin yenilənməsini tələb edir. Beləliklə, Prezident İlham Əliyevin rəhbərliyi ilə icrasına başlanılan dağ-mədən və metallurgiya sənayesinin inkişafı proqramı Daşkəsənin zəngin yeraltı sərvətlərini yerli sakinlərin daimi rifahına, regionun dayanıqlı tərəqqisinə və bütövlükdə Azərbaycanın qüdrətli sənaye dövlətinə çevrilməsi məqsədinə xidmət edən tarixi bir dönüş nöqtəsidir" - deyə millət vəkili sonda vurğulayıb.
