Ukrayna ilə Rusiya arasında davam edən müharibə fonunda Moskva və ətrafına yönələn zərbələrin intensivləşməsi diqqət çəkir. Ukraynanın məhz Rusiyanın paytaxtını Moskvanı vurması, müharibənin bu ölkədə də artıq hiss olunmasına gətirib çıxarıb. Lakin maraqlı nüanslardan biri, məhz bu hücumların qüvvələr balansını dəyişib-dəyişmədiyi, necə bir iz buraxdığıdır.
Modern.az-a açıqlamasında ukraynalı politoloq Stanislav Jelixovski bildirib ki, Ukraynanın Moskva ətrafına yönələn intensiv zərbələri psixoloji, siyasi və diplomatik baxımdan ciddi təsirə malikdir:
"Bu hücumlar Kremlin “Rusiya öz ərazisində müharibəni nəticəsiz apara bilər” narrativini şübhə altına alır və Moskvanı hava hücumundan müdafiə sistemlərinə, eləcə də kritik infrastrukturun qorunmasına əlavə resurslar ayırmağa məcbur edir.
Eyni zamanda, bu zərbələr müharibədə qüvvələr balansını fundamental şəkildə dəyişdirməyib. Rusiya hələ də əhəmiyyətli hərbi və iqtisadi resurslara malikdir. Bununla belə, Ukrayna “asimmetrik təzyiq” strategiyası yürüdərək müharibənin dəyərini artırmağa çalışır və Rusiya ərazisinin dərinliklərində yerləşən hərbi, sənaye və simvolik hədəfləri vurur".
Politoloq vurğulayıb ki, əhəmiyyətli amillərdən biri Ukraynanın tərəfdaşlarının davamlı dəstəyidir:
"Ukraynanın uzaqmənzilli imkanlarının genişlənməsi - xüsusilə dronlar, raketlər, elektron müharibə sistemləri və müdafiə istehsalı - Qərb müttəfiqləri ilə davamlı maliyyə investisiyaları, texnoloji əməkdaşlıq və birgə müdafiə layihələrindən ciddi şəkildə asılıdır. Ukrayna müdafiə sənayesinin Avropa və transatlantik tərəfdaşlarla daha sıx inteqrasiyası bu təzyiqin daha dayanıqlı olmasını təmin edə bilər".
S.Jelixovski əlavə edib ki, diplomatik baxımdan isə bu hücumlar Kiyevin gələcək danışıqlarda mövqeyini gücləndirir:
"Hücumlar Rusiyaya mesaj verir ki, müharibə yalnız Ukraynanın tükənməsini gözləməklə nəticələnməyəcək və münaqişənin uzanması Kreml üçün getdikcə artan xərclər yaradacaq. Bu, həlledici dönüş nöqtəsi olmasa da, Rusiyanın strateji arxa bölgələrinin artıq tam təhlükəsiz olmadığını göstərir".
