Azərbaycan Gənclərinin Ankara Həmrəyliyi (AGAH) İctimai Birliyinin sədri, Tübingen Universitetinin araştırmaçı doktorantı Təbriz Raufoğlu dekabrın 5-6 tarixlərində Slovakiyanın Bratislava şəhərində keçirilən ATƏT-in Nazirlər Şurasının 26-cı görüşünə qatılıb.
Bununla bağlı Modern.az-a açıqlama verən AGAH sədri qeyd edib ki, vətəndaş cəmiyyəti institutu nümayəndəsi olaraq iştirak etdiyi toplantıda ATƏT-ə üzv və qurumla əməkdaşlıq edən ölkələrin Xarici İşlər nazirlərinin iştirakı ilə ATƏT regionundakı münaqişələrə dair müzakirələr aparılıb.
T.Raufoğlu təşkil olunan yüksək səviyyəli dəyirmi masada Krımın ilhaqı və Ukraynanın şərqində davam edən separatçılıq hərəkatları ilə bərabər Dağlıq Qarabağ məsələsinin də müzakirəyə çıxarıldığını, aparılan diskussiyaların mərkəzində yer aldığını bildirib. O, əlavə edib ki, quruma üzv ölkələrin əksəriyyəti beynəlxalq hüququn dövlətlərin ərazi bütövlüyü prinsipini əsas alaraq davam edən separatçılığın aradan qaldırılması gərəkdiyini vurğulamasına rəğmən konkret addımları ehtiva edən qərarların qəbul olunmadığını, qətiyyətsizliyin davam etdiyini bildirib.
Diaspor rəhbəri Ermənistanın Xarici İşlər naziri Söhrab Mnatsakanyanın öz çıxışında ölkəsinin konfliktə yönəlik klassik mövqeyini yenidən təkrarladığını, “Dağlıq Qarabağ xalqının öz müqəddəratını təyin etməsi” kimi Azərbaycan Respublikasının ərzai bütövlüyünü heçə sayan bəyanatlara yer verdiyini və belə yanaşma ilə Dağlıq Qarabağ məsələsinin sülh yolu ilə həllinin mümkünsüz olduğunu vurğulayıb.
