Modern.az

Azərbaycan Xanımı

Azərbaycan Xanımı

Ədəbi̇yyat

7 Mart 2020, 11:13

Sübh qarıdır qeyrəti

Arı qızıl sərvəti

Örnəkdir mərifəti

Abırlı, ismətlidir

Azərbaycan xanımı.

 

Ağlı alınmaz qala

Heyranam bu kamala

Uymayır cəh-calala

Toxdur, dəyanətlidir.

Azərbaycan xanımı.

 

Siması gündü, aydı

Nuru Tanrıdan paydı

İdeala həmtaydır

Bahar təravətlidir

Azərbaycan xanımı.

 

Hər bir evə işıqdır

Özü bir yaraşıqdır

Məramı yaxşılıqdır

Daim xoş niyyətlidir

Azərbaycan xanımı.

 

Sevinclidir baxışı

Bahar eləyir qışı

Yerində davranışı

İncə nəzakətlidir

Azərbaycan xanımı.

 

 

Çox olsun qələbəsi

Duyulmasın naləsi

Həzin nəğmədir səsi

Ünü məlahətlidir

Azərbaycan xanımı.

 

Görməsin vaxtsız acı

Ataya fəxr, baştacı

Qardaşa məğrur bacı

Ərə sədaqətlidir

Azərbaycan xanımı.

 

Gəlin edək etiraf

Sözü bütöv, dürüst, saf

Əhdə çıxmayır xilaf

Ülvi məhəbbətlidir

Azərbaycan xanımı.

 

Balayçün verir canın

Şirin olan hər anın

Düşünmür güzəranın

Ucadır, qüdrətlidir

Azərbaycan xanımı.

 

Ürəyi dolu sirdir

Səlist nitqə qadirdir

Sözləri cəvahirdir

Dolğun bəlağətlidir

Azərbaycan xanımı.

 

Ucalır təmiz adla

Bilik, təhsil, savadla

Ağılla, istedadla

Hər zaman hörmətlidir

Azərbaycan xanımı.

 

 

 

Var həkimi, hakimi

İncəsənət xadimi

Yüzlərcədir alimi

Bəli, fəxarətlidir

Azərbaycan xanımı.

 

Rübayi qəzəli var.

Şeirləri yadigar

Məhsəti, Natəvanlar

Şanlıdır, şöhrətlidir

Azərbaycan xanımı.

 

Müsbəti gəlmir saya

Getmir haya-haraya

İradəsi sal-qaya

Möhkəm, qətiyyətlidir

Azərbaycan xanımı.

 

Ayların qatır ilə

Dözür çətin müşkülə

Sirrin car çəkmir elə

Güclüdür, qüvvətlidir

Azərbaycan xanımı.

 

Koroğlunun dirəyi

Sinəsində ürəyi

Nigar arxa köməyi

Mərddir mətanətlidir

Azərbaycan xanımı.

 

At belində oturan

Düşmənə qan udduran

Həcər kimi qəhrəman

Cəsur şücayətlidir

Azərbaycan xanımı.

 

 

 

Zəif, acizə gülməz

Ruhunda yoxdur qərəz

Bütün kainatı gəz

Dünyaya ibrətlidir

Azərbaycan xanımı.

 

Rənalığı üzündə

Söhbətində, sözündə

Cümlə-cahan gözündə

Gözəl, ləyaqətlidir

Azərbaycan xanımı.

 

Daim olsun firavan

Dadmasın nisgil, hicran

Ülvi Aydınçün hər an

Ən ali qiymətlidir

Azərbaycan xanımı.   

 

ÜLVİ AYDIN

Prezident təqaüdçüsü

AYB-nin üzvü

Bakı Dövlət Universitetinin doktorantı

Facebook
Dəqiq xəbəri bizdən alın!
Keçid et
Hərbi gəmilər döyüşə hazır vəziyyətə gətirildi