Թուրքիայում հաջորդ նախագահական և խորհրդարանական ընտրությունները նախատեսվում է անցկացնել 2028 թվականի ապրիլի 16-ին։ Եթե այս սցենարն իրականանա, ապա իրավական հնարավորություն կստեղծվի, որպեսզի նախագահ Ռեջեփ Թայիփ Էրդողանը կրկին և վերջին անգամ առաջադրվի նախագահի պաշտոնում։
Modern.az-ը հայտնում է, որ այս առաջարկով հանդես է եկել Թուրքիայի նախագահի գլխավոր խորհրդական և Նախագահի աշխատակազմի Իրավական քաղաքականության խորհրդի նախագահի տեղակալ Մեհմեթ Ուչումը։
Ուչումը հայտարարել է, որ գործող օրենսդրության համաձայն՝ Թուրքիայում հաջորդ նախագահական և խորհրդարանական ընտրությունների նորմալ ամսաթիվը 2028 թվականի մայիսի 7-ն է։ Սակայն, եթե Թուրքիայի Մեծ Ազգային ժողովը որոշում կայացնի ընտրությունները նորացնելու մասին, քվեարկությունը կարող է մի քանի շաբաթ առաջ տեղափոխվել՝ 2028 թվականի ապրիլի 16-ին։
Նրա խոսքով՝ դրա համար խորհրդարանը պետք է 2028 թվականի փետրվարին ընդունի ընտրությունների նորացման մասին համապատասխան որոշում։
Այս քայլը կարող է նաև իրավական հնարավորություն ստեղծել Էրդողանի կրկին առաջադրվելու համար։ Թուրքիայի Սահմանադրության 116-րդ հոդվածի համաձայն՝ եթե նախագահի երկրորդ լիազորությունների ժամկետում խորհրդարանը որոշում կայացնի ընտրությունները նորացնելու մասին, ապա գործող նախագահը կարող է ևս մեկ անգամ առաջադրվել։
Մեհմեթ Ուչումը, հենվելով հենց այս դրույթի վրա, հայտարարել է, որ Էրդողանը 2028 թվականին կարող է վերջին անգամ առաջադրվել։ Նրա խոսքով՝ դրա համար Սահմանադրության մեջ փոփոխություններ կատարելու կարիք չկա. բավական է խորհրդարանի որոշումը ընտրությունները նորացնելու մասին։
ՄՀԿ նախագահ Դևլեթ Բահչելին նույնպես մեկնաբանել է 2028 թվականի ապրիլի 16-ի առաջարկը։ Նա ասել է, որ ընտրությունների նորմալ ժամկետի և առաջարկվող ամսաթվի միջև լուրջ ժամանակային տարբերություն չկա և ընդգծել է, որ իրենք Էրդողանի կողքին են։
Նշենք, որ ապրիլի 16-ը խորհրդանշական նշանակություն ունի Թուրքիայի քաղաքականության մեջ։ 2017 թվականի ապրիլի 16-ին անցկացված հանրաքվեով ընդունվել են սահմանադրական փոփոխություններ, որոնք նախատեսում էին երկրում նախագահական կառավարման համակարգի անցում։
Այնուամենայնիվ, 2028 թվականի ապրիլի 16-ը ներկայումս պաշտոնապես հաստատված ընտրությունների ամսաթիվ չէ։ Հաղորդվում է, որ վերջնական որոշումը կախված կլինի Թուրքիայի Մեծ Ազգային ժողովի՝ ընտրությունները նորացնելու մասին որոշումից։
