Տուսկ. Ուկրաինան ամսական 27 հազար զինվոր է կորցնում։ Ուկրաինայի վերջին շրջանում ամսական ռազմական կորուստները հասել են 27 հազար մարդու։
Modern.az-ը հայտնում է, որ այս մասին հայտարարել է Լեհաստանի վարչապետ Դոնալդ Տուսկը՝ հղում անելով Կիևից ստացված տեղեկություններին։
Նրա խոսքով, Ռուսաստանի նոր ռազմական ռազմավարությունը և նոր տեխնիկական հնարավորությունները, ներառյալ ռեակտիվ շարժիչով անօդաչու թռչող սարքերը, հանգեցնում են ուկրաինական կողմի ավելի մեծ կորուստների։
«Վերջին շրջանում ամեն ամիս զոհվածների և վիրավորների թիվը կազմում է 27 հազար մարդ։ Ցավոք, սա պատերազմի ժամանակաշրջանի ռեկորդային ցուցանիշ է։ Եթե այս միտումը շարունակվի, ապա Ուկրաինայում ձմեռը կարող է իսկապես աղետալի բնույթ ստանալ», – ընդգծել է Տուսկը։
Լեհաստանի վարչապետը նախկինում ևս զգուշացրել էր, որ Ռուսաստանը կարող է ուժեղացնել իր հարձակումները Ուկրաինայի ենթակառուցվածքների, լոգիստիկ հնարավորությունների և տնտեսության դեմ։ Նա նշել է, որ ռեակտիվ շարժիչով դրոններն ավելի դժվար է հայտնաբերել։
