Եվրախորհրդարանի որոշումը՝ ֆինանսավորելու 1974 թվականին Կիպրոսի իրադարձությունների ժամանակ սեռական բռնության ենթարկված հույն կանանց հիշատակին նվիրված հուշահամալիրի ստեղծումը, բողոքի ալիք է բարձրացրել Թուրքիայում։
Թուրքական կողմը նախաձեռնությունը գնահատել է որպես Թուրքիայի զինված ուժերին թիրախավորող միակողմանի քաղաքական մոտեցման շարունակություն։ Նշվել է, որ անընդունելի է Կիպրոսի հակամարտության պատմությունը սկսել միայն 1974 թվականից և անտեսել նախորդ տարիներին կղզում տեղի ունեցած բախումները։
Վնասում է կողմերի միջև վստահության մթնոլորտին
Այս հարցի վերաբերյալ Modern.az-ի հետ զրույցում Թուրքիայի Ազգային մեծ ժողովի Ժողովրդահանրապետական կուսակցության պատգամավոր Էյլեմ Էրթուղրուլը հայտարարել է, որ Եվրախորհրդարանի որոշումը կրկին օրակարգ է բերել տարածաշրջանի զգայուն հավասարակշռությունն ու պատմական վեճերը։
Պատգամավորը նման քայլերը գնահատել է որպես սադրիչ նախաձեռնություն, որը հարվածում է կողմերի միջև վստահության մթնոլորտին.
«Տպավորություն է ստեղծվում, որ այս քայլը նպատակ ունի խոչընդոտել խաղաղության և բանակցությունների գործընթացի առաջընթացին, սահմանափակել կողմերի միջև երկխոսության հնարավորությունները։ 1974 թվականի իրադարձությունների միայն մի կողմն ընդգծելով և Կիպրոսի բարդ ու ցավոտ պատմական համատեքստն անտեսելով՝ վնասվում են կղզում կայուն խաղաղության որոնումները»։
Էյլեմ Էրթուղրուլի խոսքով՝ պատերազմի ժամանակ երկու կողմերի բախված ողբերգությունները պետք է հավասարակշռված կերպով ուսումնասիրվեն։ Նա կարծում է, որ միակողմանի քաղաքական որոշումներն էլ ավելի կբարդացնեն Թուրքիայի և Եվրոպական միության միջև զգայուն երկխոսության մթնոլորտը։
«Նման մոտեցումները, համագործակցությունը խրախուսելու փոխարեն, հանգեցնում են կողմերի հեռացմանը միմյանցից և փոխադարձ բողոքների ուժեղացմանը», – ասել է պատգամավորը։
Անտեսվում է Թուրքիայի երաշխավոր պետության կարգավիճակը
Թուրքիայի Ազգային մեծ ժողովի անդամն ընդգծել է, որ որոշումը հաշվի չի առնում 1960 թվականի Երաշխիքի պայմանագրից բխող իրավունքները և Թուրքիայի երաշխավոր պետության կարգավիճակը։
«Եվս մեկ անգամ պետք է նշել, որ Թուրքիայի զինված ուժերը կղզի են մեկնել ոչ թե որպես օկուպանտներ, այլ ջարդերը կանխելու և խաղաղությունը վերականգնելու նպատակով։ Թուրք զինվորականը գործել է կղզում խաղաղություն հաստատելու համար։ Հենց այդ ռազմական գործողությունից հետո է դադարել արյունահեղությունը», – ասել է Էյլեմ Էրթուղրուլը։
Նրա կարծիքով՝ Եվրախորհրդարանի նախաձեռնությունը քաղաքական քայլ է, որը չունի իրավական ուժ և ուղղված է թուրքական բանակի պատմական հեղինակությանը հարվածելուն։
Թուրք զինվորականի ներկայությունը անվտանգության երաշխիք է
Էյլեմ Էրթուղրուլը հայտարարել է, որ թուրք զինվորականների ավելի քան 50 տարի շարունակվող ներկայությունը Հյուսիսային Կիպրոսում կղզում խաղաղության և անվտանգության հիմնական երաշխիքներից մեկն է.
«Պատմական ճշմարտություններն անտեսող այս անարդար և քաղաքական որոշումը, որը միակողմանի մոտեցում ունի, իրավական ուժ չունի։ Մենք կտրականապես մերժում ենք առանց որևէ հիմնավորման, էթիկայից դուրս այս նախաձեռնությունը»։
Պատգամավորը Եվրախորհրդարանի որոշումը գնահատել է որպես Թուրքիայի դեմ միջազգային մակարդակով իրականացվող համակարգված արշավների շարունակություն.
«Այս որոշումը դիտարկում եմ որպես Թուրքիայի դեմ իրականացվող արշավների շարունակություն՝ պատմական իրողությունները միակողմանի արտացոլելու առումով, որոնք հիմնված են անհիմն թեզերի վրա, ինչպիսիք են հայոց ցեղասպանության մասին կեղծ պնդումները»։
