Ruminiyada “Lukoyl”ga tegishli Petrotel neftni qayta ishlash zavodi faoliyati tiklanmasa, taxminan 460 kompaniya bankrot bo'lishi mumkinligi ma'lum qilindi.
Modern.az xabar berishicha, bu haqda Ruminiya kasaba uyushmalari konfederatsiyasi Cartel Alfa rahbari Xossu ma'lum qildi. Uning so'zlariga ko'ra, korxonalarning ommaviy yopilishi natijasida taxminan 8 ming kishi ishsiz qolishi mumkin.
Petrotel zavodi Ruminiyada qayta ishlanadigan neftning taxminan 21 foizini ta'minlaydi. Korxona faoliyati AQShning Rossiyaga qarshi kiritgan sanksiyalari tufayli amalda to'xtab qolgan. Hozirda zavodda va Ruminiyadagi 300 ta “Lukoyl” yoqilg'i quyish shoxobchasida jami 3,5 mingga yaqin kishi ishlaydi.
“Lukoyl”ning asosiy aksiyadorlaridan biri va ko'p yillar davomida kompaniyani boshqargan shaxslardan biri Vahid Alekperovdir. Kompaniyaning Ruminiyadagi faoliyatining to'xtashi mamlakatning neftni qayta ishlash va yoqilg'i bozoriga, shuningdek, yuzlab mahalliy kompaniyalarga ta'sir ko'rsatishi mumkinligi aytilmoqda.
