Fransiya va Germaniyada ijtimoiy-iqtisodiy vaziyat va hukumatlarning siyosatiga qarshi ommaviy norozilik namoyishlari boʻlib oʻtdi. Fransiyada taxminan 320 ming kishi koʻchalarga chiqdi, Germaniyada esa noroziliklar 30 dan ortiq shaharni qamrab oldi.
Modern.az xorijiy OAVga tayanib xabar berishicha, Fransiyada xarid qobiliyatining pasayishiga qarshi oʻtkazilgan aksiyalar chogʻida 296 kishi hibsga olingan.
Parijda namoyishchilar va politsiya oʻrtasida toʻqnashuvlar yuz berdi. Xavfsizlik kuchlari koʻzdan yosh oqizuvchi gaz va shovqinli granatalardan foydalangan. Lion shahrida ham toʻqnashuvlar qayd etilgan.
Namoyishchilar narxlarning oshishi va byudjet xarajatlarining kamaytirilishiga norozilik bildirishdi. Aksiya ishtirokchilari Fransiya Prezidenti Emmanuel Makronning qoʻgʻirchoq boshini urib, ramziy qatl sahnasini namoyish etishdi.
Mamlakat boʻylab jamoat tartibini saqlashga taxminan 70 ming politsiya va jandarm jalb qilingan.
Fransiya Ichki ishlar vazirligi maʼlumotlariga koʻra, kelishilgan yurishlar insidentsiz yakunlangan boʻlsa-da, Bordo, Tuluza, Renn, Lill, Nant, Marsel va Lion shaharlarida radikal guruhlar aksiyalardan soʻng shahar markazlariga kirib, vandalizm va talonchilik qilishga urinishgan.
Germaniyada esa “Gen Z regelt” harakati tashkilotchiligida yoshlar kansler Fridrix Mertsnin siyosatiga qarshi norozilik namoyishlariga chiqishdi.
Berlinda Brandenburg darvozasi oldiga toʻplangan namoyishchilar Germaniya Demokratik Respublikasining bayroqlari, kommunistik ramzlar va kanslerning isteʼfosini talab qiluvchi plakatlarni koʻtarishgan.
Namoyishchilar taʼlimga ajratiladigan mablagʻlarning oshirilishini, yashash xarajatlarining kamaytirilishini va majburiy harbiy xizmatning joriy etilmasligini talab qilishdi. Ular, shuningdek, harbiy xarajatlarning oshirilishiga qarshi chiqdilar.
Baʼzi shaharlarda doʻkon egalari mumkin boʻlgan tartibsizliklardan ehtiyot boʻlib, vitrinalarini oldindan yogʻoch taxtalar bilan yopishgan.
