Polshada Konstitutsiyaviy tribunal rahbariyatining faoliyatini to'xtatish siyosiy qarama-qarshilikka sabab bo'ldi. Prezident Karol Navrotski Senegalga safarini to'xtatib, Varshavaga qaytdi.
Modern.az BBCga tayanib xabar berishicha, adliya vaziri Valdemar Jurek tribunal raisi Bogdan Shvenchkovski va uning o'rinbosari Bartlomey Soxanskinining jinoiy javobgarlikka tortilishi uchun ularning daxlsizligini bekor qilishni so'ragan. Ular parlament tomonidan saylangan yangi sudyalarning ish boshlashiga to'sqinlik qilishda ayblanmoqda.
Qarordan so'ng muxolifatdagi “Huquq va Adolat” partiyasi vakillari va tarafdorlari sud binosi oldiga to'planishdi. Namoyishchilarning binoga kirishiga to'sqinlik qilish uchun hududga maxsus politsiya kuchlari joylashtirildi.
Varshavaga qaytgan Navrotski Prezident saroyida tribunalning faoliyati to'xtatilgan raisi Bogdan Shvenchkovski va Oliy sudning birinchi raisi Zbignev Kapinski bilan tunda maslahatlashuv o'tkazdi. Keyinroq prezident Kapinski bilan birga Konstitutsiyaviy tribunal binosiga bordi.
Navrotski 31-oktabrga parlamentda vakillik qiluvchi siyosiy kuchlar vakillari ishtirokida shoshilinch maslahatlashuvlar ham chaqirdi. Prezident buning maqsadi siyosiy vaziyatni barqarorlashtirish va konstitutsiyaviy tartibni tiklash ekanligini bildirdi.
Davlat rahbari hukumatning harakatlarini konstitutsiyaviy tartibni buzish deb baholadi va politsiya kuchlarining tribunal hududini tark etishini talab qildi.
Bosh vazir Donald Tusk esa hukumat qonun ustuvorligini tiklash uchun harakatga o'tganini e'lon qildi.
Qayd etish joizki, Polshada Konstitutsiyaviy tribunal tarkibi va sudyalarni tayinlash hukumat va muxolifat o'rtasida uzoq vaqtdan beri bahs mavzusi bo'lib kelmoqda. Hukumat buni davlat to'ntarishiga urinish deb baholamoqda.
