Bokuda boʻlib oʻtgan Osiyoda oʻzaro hamkorlik va ishonch choralari boʻyicha kengash (AQEM) VII sammiti bir qator muhim qarorlar qabul qilinishi bilan yakunlandi.
Modern.az xabar berishicha, bu haqda Ozarbayjon Tashqi ishlar vazirligi (TIV) tarqatgan maʼlumotda aytilgan.
Sammit doirasida Boku deklaratsiyasi hamda Mehnat xavfsizligi va salomatligini muhofaza qilish toʻgʻrisidagi deklaratsiya qabul qilingani qayd etilgan.
Shu bilan birga, Laos AQEMning toʻlaqonli aʼzosi boʻldi.
Ozarbayjonning tashkilotga raisligi samarali rahbariyati eʼtirof etilgan holda 2026–2028-yillar uchun uzaytirildi.
Bundan tashqari, elchi Sulton Hojiyev 2026–2030-yillar uchun AQEM Bosh kotibi etib tayinlandi.
Kambodjaning tegishli konvensiyani ratifikatsiya qilishi bilan AQEM Kotibiyatining imtiyozlari va immunitetlari toʻgʻrisidagi konvensiyaning kuchga kirishi uchun talab qilingan jarayon yakunlandi.
TIV maʼlumotida Osiyoda koʻp tomonlama hamkorlik, transport aloqalari, tinchlik va xavfsizlikni mustahkamlash boʻyicha majburiyatlar yangilanganligi ham taʼkidlangan.
Ozarbayjon AQEMni muloqot, ishonchni mustahkamlash va birgalikdagi faoliyat platformasi sifatida kuchaytirishga sodiq ekanligi bildirildi.
