NİDA Vətəndaş Hərəkatının üzvü Bayram Məmmədovun barəsindəki cinayət işi üzrə Bakı Ağır Cinayətlər Məhkəməsinin 08 dekabr 2016-cı il tarixli hökmündən apellyasiya şikayəti verilib.
Bu haqda Modern.az-a onun hüquqlarını müdafiə edən Elçin Sadıqov məlumat verib.
O, şikayəti bu gün Bakı Ağır Cinayətlər Məhkəməsinə təqdim etdiyini bildirib:
“Apellyasiya şikayətində işə qismən məhkəmə istintaqı aparılmaqla baxılmasını, Bayram Məmmədovun İnsan hüquqlarının və əsas azadlıqların müdafiəsi haqqında Avropa Konvensiyanın 3,5,6,8,10,13 və 18-ci maddələri ilə təminat verilən hüquqlarının pozulmasının tanınmasını və Bakı Ağır Cinayətlər Məhkəməsinin 08.12.2016-cı il tarixli hökmünün ləğv edilərək Bayram Məmmədova bəraət verilməsini tələb etmişəm”.
B.Məmmədov Cinayət Məcəlləsinin 234-cü (qanunsuz olaraq narkotik əldə etmə və saxlama) maddəsi ilə ittiham olunaraq Bakı Ağır Cinayətlər Məhkəməsinin hökmü ilə 10 il azadlıqdan məhrum edilib.
Gülşən RAUFQIZI
