Almaniyanın 280 federal polis və gömrükçüsü Şlezviq-Qolşteyndə, Alt Saksoniyada və Şimali Reyn-Vestfaliidə on bir mənzildə və işgüzar yerdə axtarış aparıb.
Virtualaz.org bildirir ki, bu barədə Presseportal.de məlumat yayıb.
Qeyd olunur ki, bu tədbirlər Almaniyaya qeyri-leqal miqrasiyanın təşkili ilə məşğul olmuş Azərbaycan və Rumıniya vətəndaşlarından ibarət mütəşəkkil cinayətkar qruplaşmanın fəaliyyətinin araşdırılması çərçivəsində həyata keçirilib.
Almaniyanın üç regionunda aparılan axtarışların gedişatında polis əməkdaşları və gömrükçülər müxtəlif sənədləri, pulu, saxta şəxsiyyət vəsiqələrini, kompüterləri, mobil telefonları və silahları sübut kimi götürüblər.
Flensburq şəhərinin prokurorluğu tərəfindən beş nəfərə qarşı cinayət işi qaldırılıb. İstintaq onları Almaniyaya miqrantların qanunsuz trafikində və sonradan sənədlərin qanuni şəklə salınması işinin təşkilində əsas günahkar hesab edir.
Bildirilir ki, cinayətkar qruplaşma əsasən Moldovadan qanunsuz miqrasiyanın təşkili ilə məşğul olub. Cinayətkarlar miqrantları Avropa Birliyinə girişə icazə, ölkədə olma və iş icazəsi kimi saxtalaşdırılmış sənədlərlə təchiz ediblər.
İndi istintaq onlar tərəfindən Almaniyada nə qədər insanın leqallaşdırıldığını və federal büdcəyə vurulmuş maddi ziyanın ölçüsünü müəyyən etməyə çalışır.
