Məşhur milyarder İlon Mask Tvitter-i satın almaq üçün verdiyi 44 milyard dollarlıq təklifə son qoymağa çalışır, razılaşmanın bir neçə dəfə pozulduğunu iddia edir.
Modern.az BBC-yə istinadən xəbər verir ki, Mask Tvitter-in spam və saxta hesabların miqdarı haqqında kifayət qədər məlumat vermədiyi üçün alışdan imtina etdiyini söyləyib.
Tvitter razılaşmanın icrası üçün məhkəməyə müraciət etməyi planlaşdırdığını bildirib.
"Tvitter Direktorlar Şurası əməliyyatı cənab Maskla razılaşdırılmış qiymət və şərtlərlə başa çatdırmaq niyyətindədir", - Tvitter sədri Bret Taylor bəyan edib.
Orijinal birləşmə müqaviləsinə 1 milyard dollarlıq xitam haqqı daxildir.
May ayında İlon Mask saxta və spam xarakterli Tvitter hesablarının sayı ilə bağlı məlumatları gözlədiyi üçün müqavilənin "müvəqqəti olaraq dayandırıldığını" söyləmişdi.
Milyarder şirkətin spam və botların ümumi istifadəçilərin 5%-dən azını təşkil etməsi ilə bağlı iddiasını dəstəkləmək üçün dəlil istəyib.
ABŞ Qiymətli Kağızlar və Birja Komissiyasına göndərdiyi məktubda Maskın vəkili Tvitter-in bu məlumatı vermədiyini və ya verməkdən imtina etdiyini bildirib.
Məktubda deyilir: “Tvitter bəzən cənab Maskın istəklərinə məhəl qoymadı, bəzən əsassız görünən səbəblərə görə onları rədd etdi. Digər vaxtlarda cənab Maska natamam və ya istifadə edilə bilməyən məlumatlar təqdim edərkən buna əməl etdiyini iddia etdi”.
Cümə axşamı Tvitter hər gün təxminən 1 milyon spam və bot hesabını sildiyini bildirib.
Mask hesab edir ki, spam və ya botlar Tvitter istifadəçilərinin 20%-ni və ya daha çoxunu təşkil edə bilər.
Tvitter-in səhmləri elandan sonra uzadılmış ticarətdə 7% ucuzlaşıb.
