İran ABŞ və İsrailə məxsus müasir silah sistemlərini “tərs mühəndislik” yolu ilə öyrənməyə çalışır.
Modern.az Al Jazeera-ya istinadən xəbər verir ki, Tehran müxtəlif yollarla əldə etdiyi hərbi texnologiyaların konstruksiyasını analiz edərək onların analoqlarını yaratmağa çalışır. Məlumata görə, İran xüsusilə “Tomahawk” qanadlı raketləri, “Reaper” pilotsuz uçuş aparatları, JASSM tipli raketlər və GBU-57 bunker əleyhinə bombalar kimi yüksək dəqiqlikli silah sistemlərinə xüsusi maraq göstərir.
Mütəxəssislərin fikrincə, ciddi narahatlıq doğuran məqam İranın bu istiqamətdə tək fəaliyyət göstərməməsidir. Belə ki, Rusiya və Çinin potensial texniki dəstəyi Tehranın imkanlarını əhəmiyyətli dərəcədə genişləndirə bilər.
Qeyd olunur ki, mümkün əməkdaşlıq çərçivəsində idarəetmə sistemləri, elektron əks-tədbirlər və radardan yayınma texnologiyaları kimi kritik sahələrdə mühüm məlumatların əldə olunması riski artır. Bu isə regionda hərbi balansın dəyişməsinə səbəb ola bilər.
