Rusiya xarici işlər naziri Sergey Lavrov Moskva ilə İrəvan arasındakı münasibətlərin hazırkı vəziyyəti və Qazaxıstanda keçiriləcək qarşıdan gələn Avrasiya İqtisadi Birliyinin sammiti barədə şərh verib.
Modern.az xəbər verir ki, Lavrov Ermənistanın Baş naziri Nikol Paşinyanın may ayının sonunda Birlik liderlərinin görüşündə iştirak etməyəcəyi barədə qərarını "kədərli" adlandırıb. Nazir bildirib ki, həmin sammit həll olunmamış məsələləri müzakirə etmək üçün yaxşı fürsət idi.
Paşinyan bundan öncə tədbirdə gərgin seçki kampaniyası səbəbindən iştirak edə bilməyəcəyini demişdi.
Rusiya xarici işlər naziri vurğulayıb ki, Ermənistan Avropa İttifaqına qoşulmaq yolunu seçərsə, Avrasiya İqtisadi Birliyi çərçivəsində öhdəliklərini yerinə yetirə bilməyəcək. Onun sözlərinə görə, bu iki inteqrasiya yolu bir-biri ilə uyğun gəlmir.
İrəvan ittifaq daxilində iqtisadi və investisiya üstünlüklərini itirə bilər. Lavrov Qərbi Ermənistanın MDB tərəfdaşları ilə əlaqələrini kəsməyə və "aqressiv rusofobiya" tətbiq etməyə cəhd etməkdə günahlandırıb.
Nazir iki tərəfin münasibətlərini "yaxın, lakin mürəkkəb" adlandırıb və qeyd edib ki, Moskva müttəfiqinə xarici siyasət kursunu dəyişdirməyin risklərini izah etməyi öz vəzifəsi hesab edir.
