İsrail 2023-cü ildə Fələstinin HƏMAS hərəkatının hücumundan sonra baş nazir Benyamin Netanyahu hökumətinin yeni hərbi strategiyası çərçivəsində Yaxın Şərqdə təxminən 1000 kvadrat kilometr əraziyə nəzarəti ələ keçirib.
Modern.az xəbər verir ki, bu barədə “Financial Times” qəzetinin məlumatında bildirilib.
Nəşrin hesablamalarına görə, İsrail qüvvələri Qəzza zolağında, cənubi Livanda və Suriyada əraziləri ələ keçirib ki, bu da İsrailin 1949-cu il sərhədlərinin təxminən 5%-ni təşkil edir.
“Financial Times” qeyd edir ki, ələ keçirilən ərazinin yarıdan çoxu cənubi Livandadır. İsrail qüvvələri orada şiə təşkilatı “Hizbullah”ın qarşısını almaq üçün “təhlükəsizlik zonası” yaradıb. Qalan ərazilər Qəzza zolağı və Suriyada yerləşir.
Qəzetin məlumatına görə, İsrail ordusu Qəzzanın ərazisinin yarıdan çoxuna nəzarət edir və əlavə bufer zonaları da yaradıb. Nəticədə, 2 milyon insan anklavın müharibədən əvvəlki ərazisinin təxminən 40%-nə sıxışdırılıb.
Məqalədə qeyd olunur ki, bu strategiya İsrail daxilində ifrat sağçı dairələr tərəfindən dəstəklənsə də, regionda kütləvi dağıntılara və Yaxın Şərqdə gərginliyin artmasına səbəb olub.
