Ermənistanın baş naziri Nikol Paşinyan ölkəsində yerləşən Rusiyanın 102-ci hərbi bazasının çıxarılması məsələsini heç vaxt qaldırmadığını bildirib.
Modern.az xəbər verir ki, Paşinyan bu barədə Ermənistan parlamentində çıxışı zamanı danışıb.
“Mən heç vaxt 102-ci hərbi bazanın Ermənistandan çıxarılması məsələsini qaldırmamışam”, - deyə baş nazir bildirib.
Paşinyan qeyd edib ki, Bişkekdən İrəvana qayıtdıqdan sonra Rusiyanın prezidentinin “Ermənistan hərbi bazanı çıxarmağımızı istəyirsə, biz onu çıxararıq” məzmununda açıqlamasını görüb.
“Bundan sonra mən belə deyirəm: Ermənistan heç vaxt hərbi bazanın çıxarılması məsələsini qaldırmayıb. Amma Rusiya onu çıxarmaq qərarına gəlsə, Ermənistan buna etiraz etməyəcək. Çünki onun Ermənistanda mövcudluğu həyati əhəmiyyət daşımır”, - Paşinyan vurğulayıb.
Baş nazir əlavə edib ki, Rusiya hərbi bazanın Ermənistanda qalmasını istəyirsə, bu məsələni müzakirə etməyə hazırdır.
