“Hazırda ölkədə epidemioloji vəziyyət müsbətə doğru gedir. Yoluxma sayında azalma müşahidə olunur. Birmənalı olaraq epidemioloji vəziyyəti müsbət dəyərləndirmək olar”.
Modern.az-ın məlumatına görə, bunu Səhiyyə Nazirliyinin baş infeksionisti Təyyar Eyvazov “Bu gün COVID-19” mövzusunda çıxışında bildirib.
T.Eyvazovovun sözlərinə görə, sağalanların sayının yeni yoluxanları üstələməsi xəstəxana yükünün azalmasında özünü göstərir:
“Bunlar müsbət dinamikadan xəbər verir. Yoluxmaların daha çoxu Bakı şəhərində olur”.
İnfeksionist eyni zamanda peyvəndlə bağlı məsələyə də aydınlıq gətirib. O deyib ki, əksər xəstəliklərin kəskin alovlanma dövründə peyvənd vurdurmaq olmaz:
“Xəstəlik idarəolunan səviyyəyə düşəndə vaksin vurula bilər. Təbii ki, insanlar həkimə müraciət edərək xəstəliyin hansı dövrdə olduğunu öyrənə bilərlər. Həkim məsləhətindən sonra peyvənd vurdurmaq olar”.