Հայաստանը մտադիր է պահպանել բարեկամական հարաբերություններն Իրանի հետ, սակայն երկիրը չի ձեռնարկի քայլեր, որոնք կարող են պատժամիջոցների սպառնալիք ստեղծել իր համար:
Modern.az-ը հայտնում է, որ այս մասին հայտարարել է Հայաստանի վարչապետ Նիկոլ Փաշինյանը՝ մեկնաբանելով Թեհրանի դեմ կիրառված նոր սահմանափակումները:
«Մենք ուսումնասիրում ենք պատժամիջոցների փաթեթը։ Մենք լիովին թափանցիկ ենք մեր բոլոր գործընկերների հետ հարաբերություններում։ Մենք առավելագույն ջանքեր կգործադրենք, որպեսզի մեր հարաբերությունները, հատկապես բարեկամ երկրների հետ, մնան այդպիսին։ Բայց կա մի գիծ, որը մենք չենք կարող անցնել՝ Հայաստանի համար պատժամիջոցների ենթարկվելու ռիսկը»,- ասել է Փաշինյանը։
Նրա խոսքով, նման ռիսկի դեպքում Երևանը ստիպված կլինի համապատասխան որոշում կայացնել։
Նշենք, որ սեպտեմբերի 23-ից ուժի մեջ են մտել ԱՄՆ-ի նոր պատժամիջոցներն Իրանի ավիացիոն ոլորտի դեմ։ Վաշինգտոնը նախազգուշացրել է, որ իրանական ավիաընկերություններին սպասարկող օդանավակայաններն ու ընկերությունները կարող են կանգնել ԱՄՆ դոլարային համակարգից դուրս մնալու վտանգի առաջ։
Այս ֆոնին մի շարք երկրներ, այդ թվում՝ Վրաստանը, Օմանը, Արաբական Միացյալ Էմիրությունները և Իրաքը, փակել են իրենց օդանավակայաններն իրանական ավիաընկերությունների ինքնաթիռների համար։
Այնուամենայնիվ, իրանական ավիաընկերությունները շարունակում են թռիչքները դեպի Չինաստան, Հայաստան, Ռուսաստան և Թուրքիա։
