Ադրբեջանի տարածքում Հայաստանի սահմանին երկաթուղու կառուցումը կավարտվի 2027 թվականի սկզբին։ Սահմանին ավտոճանապարհի կառուցումն ավարտական փուլում է։
Modern.az-ը հայտնում է, որ այս մասին Բաքվում գերմանացի գործընկեր Յոհան Վադեֆուլի հետ համատեղ մամուլի ասուլիսում հայտարարել է Ադրբեջանի արտգործնախարար Ջեյհուն Բայրամովը։
Նախարարը նշել է, որ 2025 թվականի օգոստոսին Վաշինգտոնի գագաթնաժողովում համաձայնեցված TRIPP նախագիծը ներառում է Հայաստանի տարածքով անցնող 42 կիլոմետրանոց տրանսպորտային միջանցք։ Նախագծի իրականացման նախապատրաստական բանակցություններն անցկացվել են ԱՄՆ-ի և Հայաստանի միջև։ Քանի որ միջանցքի մուտքի և ելքի կետերը գտնվում են Ադրբեջանի հետ սահմանին, անհրաժեշտություն է առաջացել նախագծի տեխնիկական ցուցանիշները համաձայնեցնել նաև ադրբեջանական կողմի հետ։
Ջ. Բայրամովի խոսքով՝ ԱՄՆ-ի նախաձեռնությամբ ստեղծված համատեղ տեխնիկական աշխատանքային խումբը սկսել է գործել նոյեմբերի 6-ին։ Խումբը կհամաձայնեցնի երկաթուղու, ավտոճանապարհի և էլեկտրական մալուխի նախագծերի միացումների տեխնիկական պարամետրերը։