«Խաղաղության կամուրջ» նախաձեռնության շրջանակներում Ադրբեջանի և Հայաստանի քաղաքացիական հասարակության ներկայացուցիչների մասնակցությամբ հաջորդ հանդիպումը տեղի կունենա մինչև տարեվերջ։
Modern.az-ը հայտնում է, որ այս մասին Trend-ին հայտնել է «Խաղաղության կամուրջ»-ի ադրբեջանական համակարգող, Միջազգային հարաբերությունների վերլուծության և մուլտիկուլտուրալիզմի կենտրոնի վարչության նախագահի տեղակալ Ֆարհադ Մամեդովը։
Նա նշել է, որ հանդիպումը տեղի կունենա Հայաստանում։
Հիշեցնենք, որ «Խաղաղության կամուրջ» երկխոսության հարթակը ստեղծվել է Ադրբեջանի և Հայաստանի քաղաքացիական հասարակության ներկայացուցիչների միջև վստահության ամրապնդման և կայուն երկխոսության հաստատման նպատակով։ Հարթակի շրջանակներում կողմերը պարբերաբար հանդիպումներ են անցկացնում՝ քննարկելով այնպիսի հարցեր, ինչպիսիք են խաղաղության գործընթացը, տարածաշրջանային անվտանգությունը, լրատվամիջոցների և քաղաքացիական հասարակության դերը։
Առաջին հանդիպումը տեղի է ունեցել 2025 թվականի հոկտեմբերի 21-22-ին Երևանում, որի ընթացքում որոշվել են երկխոսության հիմնական ուղղությունները։ Հաջորդ կարևոր հանդիպումը տեղի է ունեցել 2025 թվականի նոյեմբերի 21-22-ին Բաքվում, որին մասնակցել են երկու երկրների փորձագետներ և ՀԿ ներկայացուցիչներ։
Վերջին հանդիպումը տեղի է ունեցել ապրիլի 10-12-ը Գաբալայում։ Նշված հանդիպմանը քննարկվել են երկու երկրների քաղաքացիական հասարակության ներկայացուցիչների միջև երկխոսության և ուղիղ կապերի խթանման հարցերը։