Եվրոպական հանձնաժողովն առաջարկել է Ուկրաինային հատկացնել ևս 45 միլիարդ եվրո ֆինանսական օգնություն՝ ի լրումն նախկինում հաստատված 90 միլիարդ եվրոյի:
Modern.az-ը հայտնում է, որ այս մասին հայտարարել է Եվրոպական հանձնաժողովի նախագահ Ուրսուլա ֆոն դեր Լեյենը։
Նրա խոսքով, նոր ֆինանսական փաթեթի 20 միլիարդ եվրոն նախատեսվում է ուղղել քաղաքացիական կարիքներին, այդ թվում՝ հիվանդանոցների և դպրոցների գործունեության ապահովմանը, իսկ 25 միլիարդ եվրոն՝ ռազմական ծախսերին։
Ֆոն դեր Լեյենը հայտարարել է, որ վարկի մարումը պետք է իրականացվի այն բանից հետո, երբ Ուկրաինան Ռուսաստանից փոխհատուցում ստանա պատերազմի հետ կապված։
Նշենք, որ նոր ֆինանսական փաթեթը նախատեսվում է Ուկրաինային տրամադրել 2027 թվականին։ Առաջարկի ուժի մեջ մտնելու համար պահանջվում է Եվրոպական միության անդամ պետությունների հաստատումը։
Ավելի վաղ Եվրոպական միությունը հաստատել էր Ուկրաինային 2026-2027 թվականների համար 90 միլիարդ եվրոյի չափով վարկի հատկացումը։