Avropa İttifaqının (Aİ) 27 ölkəsinin xarici işlər nazirləri oktyabrın 17-də Ermənistan və Azərbaycan arasında sərhəd problemlərinin həlli üçün mülki missiyanı təsdiqləmək niyyətindədirlər.
Modern.az xəbər verir ki, bu barədə TASS Aİ-nin yüksək vəzifəli nümayəndəsinə istinadən məlumat yayıb.
"Oktyabrın 6-da, bir həftə əvvəl Ermənistan, Azərbaycan, Fransa liderləri ilə Avropa İttifaqı Şurasının prezidenti arasında keçirilən görüşdə missiyanın yaradılması barədə razılıq əldə olunub. Bazar ertəsi nazirlərin bu missiyanı təsdiq edəcəyi gözlənilir”, - o, Lüksemburqda xarici işlər nazirlərinin görüşü ərəfəsində bildirib.
Ermənistan xarici işlər nazirinin müavini Paruyr Hovhannisyan bir gün əvvəl Aİ missiyasının texniki qrupunun ayın 13-də gələcəyini bildirmişdi.
Xatırladaq ki, oktyabrın 6-da Ermənistanın baş naziri Nikol Paşinyan, Azərbaycan Prezidenti İlham Əliyev, Fransa Prezidenti Emmanuel Makron və Avropa Şurasının Prezidenti Şarl Mişelin Praqada keçirdiyi görüşdən sonra İrəvan Aİ-nin mülki missiyasının Azərbaycanla sərhəddə işləməsinə razılıq verib. Missiya oktyabrda işə başlayacaq. Maksimum iki ay davam edəcək.
