Rossiya harbiy kemalari ob'ektni Suriya hukumatiga topshirish bo'yicha kelishuvga qaramay, Suriyaning Tartus portidagi bazaga qaytdi.
Modern.az xabar berishicha, bu haqda “Le Figaro” ma'lumot tarqatdi.
Gazetaning yozishicha, sentabr oyi boshida portda Rossiyaning “Admiral Levcenko” esminetsi, “Sparta” moddiy-texnik ta'minot kemasi va “Akademik Pashin” ta'minot kemasi kuzatilgan. “General Skobelev” tankeri ham ushbu flot guruhining tarkibida bo'lgan.
Ma'lumotlarga ko'ra, kemalar avgust oyi oxirida Ispaniya qirg'oqlari bo'ylab janubga harakat qilgan. Ularning rasmiy belgilangan manzili Misr ko'rsatilgan bo'lsa-da, Gibraltar bo'g'ozidan o'tgandan so'ng kemalar transponderlarini o'chirib qo'ygan.
Keyinchalik sun'iy yo'ldosh tasvirlari flotiliyaning Tartus portida to'xtaganini va noma'lum yuk tushirilganini tasdiqladi.
“Le Figaro” yozishicha, Bashar Asad hukumatining ag'darilishidan so'ng Rossiyaning Suriyadagi harbiy mavjudligi sezilarli darajada kamaygan: "Shunga qaramay, Moskva, aftidan, mamlakatdagi o'z pozitsiyalarini saqlab qolmoqda".
Gazetaning fikricha, Suriyaning yangi rahbariyatiga faqat Rossiya ta'minlay oladigan ba'zi resurslar kerak bo'lgan. Zero, Suriyaning qurol zaxiralarining katta qismi Rossiya mahsuloti bo'lib, Damashq uchun ushbu omborlarni qayta to'ldirish zarurati tug'ilgan.
