Eron Rossiya hukumatiga Isroil va AQShga qarshi urushda foydalanish uchun “Geran” dronlarining yangi versiyalarini berishni soʻragani xabar qilinmoqda.
Modern.az xabar berishicha, bu haqda Financial Times nashri gʻarb mutaxassislari va Kremlga yaqin manbaga tayanib maʼlumot tarqatdi.
Maʼlumotlarga koʻra, gap dastlab Eron tomonidan Rossiyaga yetkazib berilgan “Shahed” uchuvchisiz uchoqlarining yangi modifikatsiyalari haqida ketmoqda.
Nashrning yozishicha, yangi versiyalar soatiga 600 kilometrgacha tezlikka erisha oladi, 90 kilogrammgacha jangovar kallakni olib yura oladi va 1000 kilometrgacha masofani bosib oʻta oladi.
Yangi dronlar termal tasvirlash kameralari, sunʼiy intellektga asoslangan boshqaruv tizimlari va radioelektron toʻsiqlarga qarshi himoya vositalari bilan jihozlangani aytildi. Shuningdek, ularning Xitoyda ishlab chiqarilgan modemlar orqali tarmoq tipidagi aloqa tizimi bilan taʼminlangani qayd etilgan.
