Turkiya Eronning "Mahan Air" aviakompaniyasining ikki davlat o'rtasida amalga oshirayotgan reyslarini to'xtatadi.
Modern.az "Middle East Eye" (MEE) nashriga tayanib xabar berishicha, bu haqda nashrga Turkiya rasmiylari ma'lum qilgan.
Qaror "Mahan Air"ning Turkiya va Eron o'rtasidagi barcha parvozlariga taalluqli bo'ladi.
Bunga AQShning Eronning "Mahan Air" aviakompaniyasiga xizmat ko'rsatuvchi Turkiya kompaniyalariga qarshi sanksiyalar qo'llashi sabab bo'lgan. Qaror 21-sentabrdan kuchga kiradi.
Shu oy boshida AQSh Moliya vazirligi Eronning fuqaro aviakompaniyalari, yer usti xizmatlari va yuk tashish kompaniyalari, shuningdek, aviatsiya komponentlari yetkazib beruvchilariga qarshi sanksiyalar e'lon qildi. Sanksiya ro'yxatiga Turkiyaning uchta kompaniyasi - "S Sistem", "Mes Cargo" va "Sky Phoenix" kiritildi. Amerika idorasining ma'lumotlariga ko'ra, ular "Mahan Air"ga xizmatlar ko'rsatgan, jumladan, samolyotlarni yetkazib berish va sotib olishda ishtirok etgan, shuningdek, sotish bo'yicha xizmatlar taqdim etgan.
Kompaniyalarga sanksiyaga uchragan tashkilotlar bilan hamkorlikni to'xtatish uchun qisqa muddat berildi. AQSh Moliya vazirligi uchinchi davlatlardan bo'lgan xizmat yetkazib beruvchilarga qarshi ham mumkin bo'lgan choralar haqida ogohlantirdi.
"Endi xavf 'Mahan Air'ga xizmat ko'rsatuvchi har qanday Turkiya tashkilotiga – aeroport va yer usti xizmatlaridan tortib chipta sotish va bank operatsiyalarigacha taalluqli. Bu ishda uzilishlarga va yangi tekshiruvlarga sabab bo'lishi mumkin", - dedi "Middle East Eye"ning suhbatdoshlaridan biri.
Boshqa Turkiya rasmiylari esa Eronning barcha aviakompaniyalarining parvozlariga taqiq qo'yish haqida gap ketmayotganini ta'kidladilar. Anqara Tehron bilan aviatsiya shartnomasini, parvozlarning xavfsizligini va AQShning Turkiya kompaniyalariga qarshi mumkin bo'lgan yangi sanksiyalarini hisobga olgan holda boshqa tashuvchilar bilan bog'liq xavflarni baholashda davom etadi.
"Mahan Air" Turkiyaga tez-tez parvozlarni amalga oshirardi, jumladan, Istanbul va Tehron o'rtasida kuniga kamida uchta reysni bajarardi. Aviakompaniya 21-sentabrdan Turkiyaga va u yerdan bo'lgan parvozlarni to'xtatishini tasdiqladi. Tashuvchi shuningdek, Ummon va Gruziyaga parvozlarning to'xtatilganini ham bildirdi.
