Gruziya poytaxti Tbilisidagi munitsipal bolalar bog'chalarida ko'plab bolalarning kasallanishiga norovirus sabab bo'lganligi aniqlandi.
Modern.az xabar berishicha, bu haqda Gruziya Milliy Kasalliklarni Nazorat qilish va Jamoat Salomatligi Markazi (NCDC) ma'lumot tarqatdi.
Markazning bildirishicha, o'tkazilgan laboratoriya tekshiruvlari natijalari kasallik holatlarining aksariyati norovirus bilan bog'liqligini ko'rsatmoqda. Shunga qaramay, tadqiqotlar davom etmoqda va yakuniy natijalar keyinroq e'lon qilinishi aytilgan.
Norovirus virusli gastroenteritning asosiy sabablaridan biridir. Infeksiya odatda qusish, qorin og'rig'i, diareya, ba'zi hollarda esa isitma bilan birga keladi. Kasallik ko'p hollarda 1-3 kun ichida o'tib ketadi.
Mutaxassislar e'tibor qaratgan asosiy xavf esa kuchli qusish va diareya paytida organizmning suvsizlanishidir. NCDC ma'lumotlariga ko'ra, norovirus Gruziyada virusli gastroenterit holatlarining taxminan 40-45 foizini tashkil qiladi.
Hozirda kasal bolalarning ahvoli qoniqarli deb baholanmoqda. Jiddiy yoki hayot uchun xavfli asoratlar qayd etilmagan. Bolalarning katta qismi allaqachon tuzalish bosqichida ekanligi aytilmoqda.
Ommaviy kasallanish holatlari 17-18 sentyabr kunlari, Tbilisida bolalar bog'chalarining yangi mavsum bo'yicha faoliyat boshlaganidan ko'p o'tmay qayd etilgan.
Gruziya sog'liqni saqlash vaziri Mixeil Sardjveladzening avvalroq bergan ma'lumotlariga ko'ra, 100 dan ortiq bolani kasalxonaga yotqizishga ehtiyoj tug'ilgan.
Norovirus bilan bog'liq kasallik holatlari bir vaqtning o'zida Tbilisining 20 ta bolalar bog'chasida qayd etilgan. Ulardan 7 tasi karantin maqsadida yopilgan.
Gruziyada sodir bo'lgan bu ommaviy kasallanish holatlari fonida ota-onalarga bolalarda qusish va diareya kabi simptomlar kuzatilganda suyuqlik yo'qotilishiga alohida e'tibor berish tavsiya etiladi.
