Armaniston Bosh vaziri Nikol Pashinyan Ozarbayjon bilan tinchlik allaqachon real holatga aylanganini, keyingi bosqichda esa bu jarayonni huquqiy jihatdan rasmiylashtirish muhimligini bildirdi.
Modern.az xabar berishicha, Pashinyan bu fikrlarni Bryusselda bo'lib o'tgan Yevropa Ittifoqining kengayishi bo'yicha sammit doirasida “Euronews”ga bergan intervyusida aytgan.
Bosh vazirning so'zlariga ko'ra, Yevropa Ittifoqining mojaroli mamlakatni a'zolikka qabul qilishga tayyorligi ishonchli ko'rinmaydi. Shunga qaramay, u Armaniston va Ozarbayjon o'rtasidagi munosabatlarda ijobiy o'zgarishlar yuz berganini ta'kidladi. Pashinyan 2025-yil 8-avgustda Vashingtonda erishilgan kelishuvlardan so'ng ikki davlat o'rtasida tinchlik o'rnatilganini qayd etdi.
U bu jarayonda AQSh Prezidenti Donald Trampning tashabbusi va qo'llab-quvvatlashini alohida ta'kidladi.
Pashinyan erishilgan kelishuvlar nafaqat tinchlik niyatini ifodalovchi hujjat, balki real vaziyatga ham ta'sir ko'rsatganini bildirdi:
Bosh vazir erishilgan natijalarni institutsional darajada mustahkamlash muhimligini ham ta'kidladi. Uning so'zlariga ko'ra, hozirgi xalqaro vaziyat fonida tinchlikni huquqiy asoslarda mustahkamlash alohida ahamiyatga ega.
“Ayniqsa, dunyoda sodir bo'layotgan voqealarni hisobga olsak, hozir tinchlikni institutsionallashtirish juda muhim. Armaniston va Ozarbayjon o'rtasidagi tinchlik shartnomasi Vashingtonda tashqi ishlar vazirlarimiz tomonidan paraflangan. Endi biz shartnomani imzolashimiz va uni ratifikatsiya qilishimiz kerak”, – deb ta'kidladi Pashinyan.
