O'zbekiston poytaxti Toshkent shahrida Ozarbayjon Respublikasining 8-noyabr – G'alaba kuni munosabati bilan rasmiy qabul tashkil etildi.
Modern.az xabar berishicha, Ozarbayjon Respublikasining O'zbekiston Respublikasidagi Elchixonasi va Elchixona qoshidagi Haydar Aliyev nomidagi Ozarbayjon Madaniyat Markazi hamkorligida "Hyatt Regency Tashkent" mehmonxonasida bo'lib o'tgan rasmiy qabulda davlat va hukumat vakillari, diplomatik korpus a'zolari, xalqaro tashkilotlar vakillari, ilm-fan, madaniyat va san'at arboblari, diaspora a'zolari, shuningdek, mahalliy va xorijiy ommaviy axborot vositalari vakillari ishtirok etdilar.
Tadbir doirasida Ozarbayjonning shonli G'alaba yilnomasini aks ettiruvchi "Shonli tariximizning 44 kuni" nomli fotosuratlar ko'rgazmasi tashkil etildi. Unda 44 kunlik Vatan urushi davrida Ozarbayjon Armiyasining ko'rsatgan qahramonligi, yerlarimizning ishg'oldan ozod etilishi va tarixiy G'alabamizning unutilmas lahzalarini aks ettiruvchi fotosuratlar namoyish etildi. Fotomateriallar tadbirda ishtirok etgan davlat va jamoat vakillari tomonidan katta qiziqish bilan kutib olindi.
Rasmiy qabulda so'zga chiqqan Ozarbayjon Respublikasining O'zbekiston Respublikasidagi Favqulodda va Muxtor Elchisi, doktor Rashad Mammadov 8-noyabr – G'alaba kunining Ozarbayjon xalqi tarixidagi o'ziga xos ahamiyati haqida so'z yuritdi. Elchi ta'kidladiki, Ozarbayjon Respublikasi Prezidenti, Qurolli Kuchlar Oliy Bosh Qo'mondoni Ilhom Aliyev rahbarligida 2020-yil 27-sentabrda boshlangan va 44 kun davom etgan Vatan urushi Ozarbayjon xalqining birlik, azm va qat'iyatining tantanasiga aylandi. Ozarbayjon Armiyasining ko'rsatgan qahramonligi, jasorati va fidoyiligi natijasida uzoq yillar ishg'ol ostida qolgan yerlarimiz ozod etildi, 2020-yil 8-noyabrda Ozarbayjon va Turk dunyosining madaniyat poytaxti, qadimiy Shusha shahrining ozod etilishi bilan tarixiy G'alaba qozonildi.
Diplomat ta'kidladiki, 8-noyabr G'alabasi Ozarbayjon xalqining milliy xotirasiga abadiy muhrlangan, mamlakatimizning zamonaviy davlatchilik tarixida yangi bosqichga asos soldi.
Rasmiy qismdan so'ng G'alaba kuniga bag'ishlangan tantanali badiiy dastur taqdim etildi. Konsert dasturida Ozarbayjon Davlat "Qaya" Ansambli, Ozarbayjon Respublikasining O'zbekiston Respublikasidagi Elchixonasi qoshidagi Haydar Aliyev nomidagi Ozarbayjon Madaniyat Markazining "Qorabog' G'alabasi" Raqs Ansambli, "Xoribulbul" Teatr Truppasining solistlari, shuningdek, O'zbekiston va Qoraqalpog'iston Xalq artisti, Qozog'iston va Turkmanistonning Xizmat ko'rsatgan artisti Yulduz Usmonova chiqish qildilar. San'atkorlarning taqdim etgan musiqa va raqs nomerlari konsert dasturiga o'zgacha rang bag'ishladi, mehmonlar tomonidan katta qiziqish bilan kutib olindi.
Konsert dasturining diqqatga sazovor joylaridan biri Haydar Aliyev nomidagi Ozarbayjon Madaniyat Markazining "Qorabog' G'alabasi" raqs ansambli tomonidan Ozarbayjonning qadimiy yurti Zangazurning boy folklor an'analarini yashatuvchi "Zangazur yallisi" raqsining taqdimoti bo'ldi. Ozarbayjon xalqining qadimiy milliy raqs an'analarini, birlik va hamjihatlik ruhini o'zida aks ettirgan bu raqs kompozitsiyasi o'ziga xos ritmi va dinamik ijrosi bilan tomoshabinlar tomonidan katta qiziqish bilan kutib olindi.
Badiiy kecha Ozarbayjon va O'zbekiston o'rtasidagi madaniy aloqalarni yanada mustahkamlash, milliy san'at namunalarini targ'ib qilish va xalqlarimiz o'rtasida o'zaro madaniy almashinuvni kengaytirish nuqtai nazaridan muhim ahamiyat kasb etdi.
