Prezident Ilhom Aliyev Turk Davlatlari Tashkilotiga (TDT) a'zo davlatlarning intellektual mulk idoralari rahbarlarining 2-uchrashuvi ishtirokchilariga murojaat qildi.
Modern.az ma'lumotiga ko'ra, murojaatda shunday deyiladi:
"Hurmatli tadbir ishtirokchilari!
Sizlarni Boku shahrida Turk Davlatlari Tashkilotiga (TDT) a'zo davlatlarning intellektual mulk idoralari rahbarlarining 2-uchrashuvida samimiy qutlayman.
Ozarbayjon har doim, ayniqsa, TDTga raislik davrida tashkilotning institutsional jihatdan mustahkamlanishi, global miqyosda nufuzining oshishi va yagona oilamiz bo'lgan Turk dunyosining yaqin birlashishi yo'lida barcha sa'y-harakatlarini safarbar etgan.
Tarixiy Ipak yo'lining markazida joylashgan Turk dunyosi barcha davrlarda buyuk shaxslar, olimlar, mutafakkirlar vatani bo'lgan. Xalqlarimizning boy ilmiy va madaniy merosi, katta inson kapitali va o'sib borayotgan innovatsion salohiyati TDT doirasida intellektual mulk sohasida hamkorlikning alohida yo'nalish sifatida shakllanishi va yaqin o'zaro faoliyat uchun imkoniyatlar yaratadi. Shu nuqtai nazardan, tegishli idoralar rahbarlarining uchrashuvlarini tashkil etish tahsinga loyiqdir. O'tgan yili Bishkek shahrida bo'lib o'tgan birinchi uchrashuv bu sohada tashlangan muhim qadam edi.
Sun'iy intellekt, raqamlashtirish va boshqa yangi yechimlarning jadal rivojlanishi intellektual mulk tizimlari oldiga yangi vazifalarni qo'yadi. Bu jarayonda texnologik taraqqiyot yaratgan imkoniyatlardan samarali foydalanish bilan birga, muallif va ixtirochilar huquqlarining ishonchli himoyasi, innovatsiyalarni rag'batlantirish va jamiyat manfaatlarii o'rtasida optimal muvozanatni ta'minlash alohida ahamiyat kasb etadi.
Ozarbayjonda raqamli transformatsiyani tezlashtirish, shuningdek, sun'iy intellektni qo'llashni kengaytirish sohasida ilmiy tadqiqotlar va malakali kadrlar salohiyatini mustahkamlash maqsadida izchil chora-tadbirlar amalga oshirilmoqda.
Turk xalqlarining umumiy madaniy merosini himoya qilish, uning o'zlashtirilishi va buzilishining oldini olish birgalikdagi faoliyatimizning yetakchi yo'nalishlaridan biri bo'lishi kerak. Ozarbayjonda intellektual mulk huquqining asoslari Ulug' Yo'lboshchi Haydar Aliyev tashabbusi bilan qo'yilgan va keyingi yillarda yanada takomillashtirilgan.
Aminmanki, Boku uchrashuvi davomida olib boriladigan muhokamalar, ilgari suriladigan tashabbuslar intellektual mulk institutlari o'rtasidagi hamkorlikni yangi bosqichga ko'tarishga, Turk dunyosining global raqobatda ortda qolmasligini ta'minlash maqsadida har tomonlama rivojlanish uchun qulay muhitni shakllantirishga hissa qo'shadi.
Tadbir ishiga muvaffaqiyatlar tilayman".
