Modern.az

Peşə məktəblərinə qəbul başa çatıb

Peşə məktəblərinə qəbul başa çatıb

29 Sentyabr 2009, 13:50

Təhsil Nazirliyinin Texniki-peşə təhsili şöbəsindən Modern.az-a verilən məlumata görə, hazırda ölkədə 108 texniki-peşə təhsili müəssisəsi fəaliyyət göstərir ki, onlardan da 47-si peşə liseyi, 61-ı peşə məktəbidir. Bu müəssisələrdə 25520  şagird oxuyur. Bakıda yerləşən 35 peşə təhsili müəssisəsindən 18-i peşə liseyi, 10-u peşə məktəbidir, 7-si isə cəzaçəkmə müəssisələrində fəaliyyət göstərir. Peşə təhsili müəssisələrində 3770 mühəndis-pedaqoji işçi çalışır.

Rəsmi statistikaya görə, hər il respublikmızda ümumtəhsil məktəblərinin XI siniflərini bitirən 120 min şagirddən cəmi 14 mini texniki peşə məktəblərinə qəbul olunur. İnkişaf etmiş ölkələrdə ölkələrdə orta məktəb məzunlarının 40-60 faizi texniki peşə təhsili sahəsinə yönəldiyi halda, Azərbaycanda bu göstərici 10-11 faiz təşkil edir. Mütəxəssislər bunu texniki peşə təhsili müəssisələrimizin bina şəraiti, maddi-tədris və texniki bazasının müasir səviyyəli sənətkar kadrlarının hazırlanması baxımından beynəlxalq tələblərə cavab verməməsilə izah edirlər. Təhsil Nazirliyinin Texniki-peşə təhsili şöbəsindən bildirilib ki, 2007-2012-ci illəri əhatə edən «Texniki peşə təhsilinin inkişafı üzrə Dövlət Proqramı»nın icrası sayəsində bu sahədə ciddi irəliləyiş baş verməkdədir. Bu proqramda texniki-peşə təhsilinin ictimai statusunun yüksəldilməsi, maddi-texniki bazanın möhkəmləndirilməsi, yeni iqtisadi münasibətlərin formalaşdırılması, idarəetmə və kadr hazırlığı işinin təkmilləşdirilməsinin prioritet istiqamət kimi müəyyənləşdirilib. Proqrama əsasən Təhsil Nazirliyi Avropa Təhsil Fondu, Beynəlxalq Əmək Təşkilatı, Dünya Bankı, Britaniya Şurası, YUNESKO, Cənubi Koreyanın «DAEWOO» şirkəti və digər beynəlxalq təşkilatlarla birgə texniki-peşə təhsili sahəsində müxtəlif layihələr həyata keçirir. Təhsil Nazirliyindən verilən məlumata görə, 2008-ci ildə dövlət vəsaiti hesabına 9 texniki-peşə məktəbi əsaslı təmir olunub. Ötən il Qəbələ Turizm və Otelçilik üzrə Peşə Tədris Mərkəzi istifadəyə verilib, İsmayıllıda da belə mərkəz tikilməkdədir. Lakin peşə təhsili sahəsində problemlərin hələ çox olduğu bildirilib. Hazırda 24 peşə təhsili müəssisəsinin binası yararsız vəziyyətdədir, ümumilikdə 55 peşə təhsili müəssisəsində 14411 (3258 ailə) məcburi köçkün məskunlaşıb. Maşınqayırma, kənd təsərrüfatı, metal emalı, tikinti, rabitə, nəqliyyat və neft-qaz sahələri üzrə ixtisaslı kadrların hazırlanması üçün ehtiyac olan avadanlıqların çatışmazlığı bu sahələr üzrə kadrların hazırlanması istiqamətində problemlər yaradır.

Təhsil Nazirliyinin 2009-2010-cu tədris ili üçün elan etdiyi Azərbaycan Respublikasının peşə məktəblərinə şagird qəbulu artıq başa çatıb. Texniki peşə təhsili şöbəsindən bildirilib ki, avqustun 1-dən 31-dək ərizə qəbulu həyata keçirilib, sentyabrın 2-dən 10-dək isə şagird seçimi aparılıb.

Təhsil nazirinin əmrinə əsasən, 2009-cu ildə peşə liseyi və peşə məktəblərinə şagird qəbul planı 14435 nəfər (dövlət vəsaiti hesabına 12350 nəfər, ödənişli əsaslarla 2085 nəfər) müəyyənləşdirilib. Ağdam, Qubadlı, Cəbrayıl, Zəngilan rayonlarında və Şuşa şəhərinin texniki peşə məktəblərinə qəbul aparılmayıb. Artıq peşə məktəblərində dərslər də başlayıb.

                                   

“Modern.az”

 

Telegram
Hadisələri anında izləyin!
Keçid et
Son dəqiqə- Paşinyan Qazaxın Əskipara kəndinə gəldi