ABŞ-ın keçmiş konqresmeni Marjori Teylor Qrin ABŞ administrasiyasının İranla bağlı strategiya toplantılarında nüvə silahından istifadə imkanını müzakirə etdiyini iddia edib.
Modern.az xəbər verir ki, Qrin bu barədə sosial şəbəkədə paylaşımında bildirib.
Onun sözlərinə görə, ABŞ administrasiyası daxilində İran məsələsi ilə bağlı keçirilən yüksək səviyyəli strategiya görüşlərində nüvə silahından istifadə məsələsi müzakirə olunur.
Qrin iddiasını kifayət qədər sərt ifadələrlə təqdim edib və bununla bağlı “spekulyasiya etmədiyini”, məlumatın real olduğunu bildirdiyini deyib. Lakin keçmiş konqresmen iddiasını təsdiqləyən konkret sübut və ya mənbə təqdim etməyib.
Qrin hesab edir ki, belə bir qərar qəbul edilərsə, bunun nəticələri yalnız ABŞ və İranla məhdudlaşmaya, daha geniş regional və qlobal qarşıdurmaya səbəb ola bilər.
O, həmçinin Donald Trampın əvvəlki dövrdə yeni xarici müharibələrə cəlb olunmamaqla bağlı verdiyi vədləri xatırladaraq, nüvə silahından mümkün istifadənin çox ağır nəticələr doğura biləcəyi barədə xəbərdarlıq edib.
Qeyd edək ki, bu məlumat hazırda yalnız Marjori Teylor Qrinin iddiasına əsaslanır. ABŞ administrasiyasının nüvə silahından İrana qarşı istifadə ilə bağlı belə bir planı müzakirə etdiyini təsdiqləyən müstəqil rəsmi məlumat təqdim edilməyib.
