Əməkdar artist Elza Seyidcahan saytları məhkəməyə verib.

Bu barədə Modern.az-a ifaçı özü məlumat verib. O bildirib ki, xəbər saytları ilə bağlı məhkəməyə müraciət etməsinin səbəbi onun haqqında dezinformasiya yayılmasıdır:

“Biz “Sənə bənzər” adlı solo konsertimə hazırlaşan ərəfədə xəbər saytlarında mənə aid olduğu iddia edilən şeir yayımlandı. Ona şeir də demək olmaz, söz yığını idi. Həmin söz yığınının müəllifi mən deyiləm, adımdan yalan-yanlış xəbərlər dərc etdilər. Məhkəməyə müraciət etdim ki, məsələ araşdırılsın, hadisənin mənbəyi hansı sayt olub üzə çıxarılsın. Hazırda məhkəmə prosesi davam edir”.

Qeyd edək ki, Elza Seyidcahan aprelin 28-də Heydər Əliyev adına Sarayda "Sənə bənzər" adlı konsert proqramı ilə çıxış edib. Konsert proqramı müğənninin 25 illik səhnə fəaliyyətinə həsr olunub.

Onun olduğu iddia edilən “Sevgi nədir deyirlər?” adlı şeir isə xəbər saytlarında aprelin 24-ü yayılıb.