Bakının Xətai rayonunda Müdafiə Sənayesi Nazirliyinin "Radioquraşdırma" zavodunun yanındakı yanacaqdoldurma stansiyasında partlayış baş verib.
Fövqəladə Hallar Nazirliyinin (FHN) Dövlət Yanğından Mühafizə Xİdmətindən Trend-ə verilən məlumata görə, hadisə stansiyanın yeraltı qaz çənində qaz sızması nəticəsində baş verib.
Məlumata görə, partlayış nəticəsində yanğın olmayıb.
Bakı Şəhər Təcili və Təxirəsalınmaz Tibbi Yardım Stansiyasından (BŞTTTYS) Trend-ə bildiriblər ki, hadisə saat 16:20-də baş verib. Hadisə yerinə Stansiyanın həkim briqadaları cəlb olunub.
Şahidlərinin verdiyi məlumata görə, partlayış nəticəsində 2 nəfər ölüb.
BŞTTTYS-dən Trend-ə verilən məlumata görə, partlayış "LUKOIL" şirkətinə məxsus yanacaqdoldurma stansiyasında baş verib.
Stansiyadan həmçinin bildiriblər ki, hadisə nəticəsində 1 nəfər ölüb, 1 nəfər isə ağır xəsarət alıb. Yaralı Respublika Neyrocərrahiyyə Xəstəxanasına yerləşdirilib.
LUKOIL-ın Bakıdakı ofisindən Trend-ə verilən məlumata görə, hazırda şirkətin mütəxəssisləri hadisə yerindədirlər və partlayışın başvermə səbəbini araşdırırlar.
Trend-in hadisə yerində olan əməkdaşının məlumatına görə, partlayış nəticəsində yaxınlıqdakı "Mitsubishi" markalı avtomobilə də ziyan dəyib.
Məlumata görə, LUKOIL-a məxsus həmin yanacaqdoldurma məntəqəsi təmirdən sonra istifadəyə verilməyə hazırlanırmış.
Respublika Neyrocərrahiyyə Xəstəxanasından Trend-ə verilən məlumata görə, yaralı 1986-cı il təvəllüdlü kişidir. Hazırda yaralının vəziyyəti kafi qiymətləndirilir.
FHN-in hadisə yerində olan əməkdaşlarının Trend-ə bildirdiyinə görə, hadisə zamanı iki nəfər ölüb. Onlar Orucov Şamxal və İmamverdiyev Həsrətdir.
Ölənlər məntəqədə aparılan son tamamlama işlərində çalışan şəxslər olub.
Modern.az
