Modern.az xəbər verir ki, Nizami rayon İcra Hakimiyyətinin və Nəsimi rayon İcra Hakimiyyətinin dəstəyilə Yeni Azərbaycan Partiyası Nizami rayon təşkilatının və YAP Nəsimi rayon təşkilatının fəalları birgə Novruz bayramını cəbhə xəttində əsgərlərlə qeyd ediblər.
N saylı hərbi hissədə əsgərlərlə görüşən fəallar əvvəlcə onların bayramını təbrik ediblər.YAP Nəsimi rayon təşkilatının sədri, millət vəkili Məlahət İbrahimqızı bu gün Azərbaycan ordusu nəinki bölgəmizin hətta, Şərqi Avropanın ən güclü ordularından biri olduğunu vurğulayıb: “Əsgərlərimizdəki çox yüksək vətənpərvərliklə yanaşı ordumuzun maddi-texniki bazasının gücləndirilməsi və müasir silahlarla təchiz edilməsi bir daha sübut edir ki, Azərbaycan Ordusu qarşıya qoyulan vəzifələri qısa zamanda və yüksək keyfiyyətlə yerinə yetirməyə qadirdir”.
YAP Nizami rayon təşkilatının sədri, Milli Məclisin deputatı Sədaqət Vəliyeva çıxışında Azərbaycan əsgərlərinin hər zaman Ali Baş Komandan, Prezident İlham Əliyevin istənilən əmrini yerinə yetirməyə hazır olduqlarını qeyd edib: “Çətin şəraitdə yüksək səviyyədə öz döyüş tapşırığını yerinə yetirən əsgərlərimizin arzusu Azərbaycanın ərazisini bütöv görmək və onun təmin olunmasında şəxsən iştirak etməkdir. Sevindiri hal da budur ki, ən çətin şəraitdə, ən çətin tapşırığa siz əsgərlərimiz hazırsınız”.
Daha sonra Nizami rayon İcra Hakimiyyətinin başçısının müavini Gülnaz İsrafilova çıxış edib: “Xalq öz ordusuna inanır və Azərbaycan əsgəri bu gün döyüşə hazırdır və bizim inamımız ancaq əsgərimizədir. Düşünürəm ki, biz ancaq əsgərlərimizin sayəsində torpaqlarımızı azad edə biləcəyik”.
Təbriklərə görə şəxsi heyət adından minnətdarlığını bildirən N saylı hərbi hissənin komandiri İsgəndər Qiyasov əzmli, qüdrətli Azərbaycan ordusunun hər zaman Ermənistan silahlı qüvvələri tərəfindən işğal edilmiş torpaqlarımızı azad etməyə hazır olduqlarını bildirib.
Sonra əsgərlərə Novruz bayramı münasibətilə bayram sovqatı verilib və konsert proqramı təşkil edilib. Daha sonra millət vəkilləri Milli Qəhrəmanımız Mübariz İbrahimovun xidmət etdiyi və hazırda onun adını daşıyan “Mübariz” postuna baş çəkiblər.
Düşmən ordusu ilə üz-üzə olan postda əsgərlərlə görüşən millət məkilləri onların da bayramını təbrik ediblər, şərəfli xidmətdə uğurlar arzulayıblar.
Həmçinin, millət vəkilləri ön xətdəki müşahidə mövqelərindən müasir müşahidə aparatları vasitəsilə ermənilərin işğalı altında olan Azərbaycan ərazilərini və düşmən mövqelərini müşahidə ediblər, eyni zamanda, əsgər yeməkxanası və yataqxanası ilə də tanış olub, onların xidmətləri barədə maraqlanıblar.
Modern.az
