Bakı Şəhəri üzrə Təhsil İdarəsi (BŞTİ) və “Park Cinema” kinoteatrlar şəbəkəsi arasında uşaq, yeniyetmə və gənclərin istirahətlərinin, asudə vaxtlarının səmərəli təşkilini təmin etmək məqsədi ilə əməkdaşlığa başlanılıb. BŞTİ-nin mətbuat xidmətindən Modern.az-a verilən məlumata görə, 14 aprel tarixindən mayın 2-ə qədər Nərimanov rayonu üzrə ümumtəhsil məktəblərinin əlaçı şagirdləri (2828 nəfər) “Park Cinema” kinoteatrlar şəbəkəsinin “Metropark” alış-veriş mərkəzində yerləşən kinoteatrında göstərilən film və animasiyaları təmənnasız izləyə biləcəklər. Ancaq şagirdlər üçün nəzərdə tutulan film və animasiyaların həftənin 5 günü 2 seans olaraq göstərilməsi nəzərdə tutulub.
Birinci seans saat 15:00, ikinci seans isə saat 17:00 – da baş tutacaq.
Layihənin əsas məqsədi Azərbaycan mədəniyyətinin inkişafı üçün uşaq, yeniyetmə və gənclər arasında kino və teatrlara getmək mədəniyyətini formalaşdırmaq və təhsildə fərqlənən şagirdləri stimullaşdırmaqdır.
Modern.az
