Uzun müddətdir Milli Məclisdə Qarabağ məsələsi müzakirə edilmir. Böyük Quruluş Partiyasının başqanı, deputat Fazil Mustafa Modern.az saytına deyib ki, bu, indi də mümkün deyil:
“Praktika göstərir ki, nədənsə Milli Məclisdə Qarabağla bağlı müzakirələrin aparılmasını öz üzərinə götürmək istəmirlər. Hesab edirəm ki, ən azı qapalı iclaslarda müzakirələrin aparılması vacibdir.
Biz dəfələrlə Qarabağla bağlı məsələnin vacibliyini nəzərə alaraq Milli Məclisdə müzakirə aparılmasını istəmişik. Amma reaksiya verilməyib”.
Onun fikrincə, bunun əsas səbəbi problemə ancaq məmurların öhdəsində olan məsələ kimi yanaşılmasıdır:
“Ümid edək ki, məsələ növbəti dəfə qaldırılanda reaksiya veriləcək”.
Qeyd edək ki, 2001-ci il fevralın 23-24-də Milli Məclisin Ermənistan – Azərbaycan, Dağlıq Qarabağ münaqişəsinin sülh yolu ilə həlli prosesinə aid məsələyə həsr edilən iclası keçirilib.
İclasda mərhum prezident Heydər Əliyev Dağlıq Qarabağ problemi ilə əlaqədar baş verən prosesləri şərh edərkən haqlı olaraq qeyd edirdi ki, əgər müstəqilliyin ilk illərində bütün Azərbaycan xalqını hiddətləndirən, vahid sarsılmaz bir qüvvə kimi meydanlara toplayan milli qürur, milli oyanış hisslərindən lazımi şəkildə istifadə olunsaydı, vəziyyət bu dərəcədə mürəkkəbləşməzdi.
Prezidentin iştirakı ilə keçirilən bu iclasa ölkədə fəaliyyət göstərən siyasi partiyaların, qeyri-hökumət təşkilatlarının, habelə ziyalıların, bütövlükdə geniş ictimaiyyətin nümayəndələri dəvət olunmuşdular.
Gülşən RAUFQIZI
