Հայաստանի և Թուրքիայի լրատվամիջոցների կարգավորող մարմինները պատրաստվում են ստորագրել հեռարձակման ոլորտում համագործակցության հուշագիր:
Modern.az-ը հայտնում է, որ Հայաստանի հեռուստատեսության և ռադիոյի հանձնաժողովի տարածած տեղեկատվության համաձայն՝ հուշագրի նախագիծն արդեն մշակվում է:
Հարցը քննարկվել է սեպտեմբերի 16-ին Սոֆիայում Հայաստանի հեռուստատեսության և ռադիոյի հանձնաժողովի նախագահ Տիգրան Հակոբյանի և Թուրքիայի ռադիոյի և հեռուստատեսության բարձրագույն խորհրդի (RTÜK) նախագահի տեղակալ Դենիզ Գյուլերի հանդիպմանը:
Հանդիպման ընթացքում կողմերը քննարկել են հեռարձակման ոլորտում համագործակցության զարգացման, լրատվամիջոցների կարգավորման և երկու երկրների համապատասխան մարմինների միջև կապերի ընդլայնման հարցերը։ Հայկական կողմի տեղեկատվության համաձայն՝ պայմանավորվածություն է ձեռք բերվել շարունակել աշխատանքները համագործակցության հուշագրի ստորագրման ուղղությամբ:
