Müxalifət qüvvələrinin cəmləşdiyi İctimai Palata Azərbaycanın xalq yazıçısı, “Daş yuxular” romanı ilə böyük qalmaqala səbəb olan Əkrəm Əylisli ilə bağlı bəyanat verdi. Modern.az-ın məlumatına görə, bəyanatda qeyd edilib ki, tanınmış yazıçı Əkrəm Əylislinin Azərbaycan –erməni münasibətləri mövzusunda qələmə aldığı “Daş yuxular” romanı cəmiyyətdə təpki ilə qarşılanıb, kəskin neqativ rəy və hərəkətlərə səbəb olub.
İctimai Palata hər kəs kimi , Əkrəm Əylislinin də ifadə azadlığını, yaradıcılıq hüquqlarını qeydsiz-şərtsiz tanıyar; eyni zamanda, bu əsərdə erməni - Azərbaycan münasibətləri haqqında həqiqətlərin təhrif edilməsinə, Azərbaycan tarixinin saxtalaşdırılmasına, milli, mənəvi və dini dəyərlərimizin aşağılanmasına etirazların haqlı olduğunu qəbul edir və bu etirazlarla həmrəydir.
Təəssüflə qeyd edilməlidir ki, müəllifin niyyətinin nə olmasından asılı olmayaraq bu roman Azərbaycan və erməni xalqları arasında münaqişənin aradan qalxmasına deyil, dərinləşməsinə xidmət edir; xalqlar arasında düşmənçilik və nifaq yayanların cəbbəxanasında yer tutur və Azərbaycana, onun xalqına qarşı istifadə olunacaqdır.
İctimai Palata Ə. Əylisliyə və ailəsinə qarşı təqibləri, xüsusilə qaragüruhçu, səviyyəsiz divantutma çağırışlarını yolverilməz hesab edir və pisləyir.
Modern.az
